Liverpool ka vendosur të marrë në punë një trajner të veçantë që do të kujdeset vetëm për të mësuar lojtarët se si të realizojnë ridhëniet anësore. Jurgen Klopp do të ketë si asistent të tij Thomas Gronnemark, i cili më parë do të provojë të zbatojë teknikën e tij tek lojtarët e akademisë, për të kaluar më pas në skuadrën e parë.
Danezi është marrë prej 15 vitesh me zhvillimin e teknikave për ridhëniet anësore dhe Liverpool bëhet klub i parë anglez që e punëson. Gronnemark përdor pamje filmike për t’u mësuar lojtarëve mënyrat më të mira për të shfrytëzuar në maksimum ridhëniet anësore, sidomos në afërsi të zonës kundërshtare.
Sipas vlerësimit të vetë Gornnemark, dy skuadrat daneze që ai ka stërvitur deri tani, kanë arritur të shënojë mbi 20 gola më tepër për shkak të përmirësimit të teknikave të ekzekutimit të ridhënieve anësore. Shifra këto që kanë bindur Jurgen Klopp t’i japë një mundësi, pasi trajneri gjerman kërkon me doemos të fitojë kampionatin, që do të ishte i pari për Reds-at që kur është krijuar Premier League.
Gronnemark pretendon se ai vetë mund ta dëregojë topin me duar deri në 50 metra largësi ndërsa kujton suksesin më të madh për të, ecurinë fantastike të skuadrës daneze Midtjylland në Europa League tre vjet më parë, falë edhe ridhënieve anësore. “Është një armë e fuqishme nëse e përdor me teknikën e duhur, saktësi dhe taktikë. Është shumë e rëndësishme që ridhëniet të jenë sa më të drejta, pasi kur topit i jep shumë hark është më e lehtë për mbrojtësit. Nëse e bën si duhet, është e lehtë të shënosh”.
