Dikur ishte akademik në universitet, por tani është punëtor ndërtimi. Orhan Kaya nga Turqia, u shkarkua nga vala e shkarkimeve në vend dy vite më parë.
Kaya, i cili jepte mësim në Universitetin “Abant İzzet Baysal” në provincën Bolu, u shkarkua nga universiteti me një dekret të qeverisë, pas nënshkrimit të tij të një peticioni që i bënte thirrje qeverisë turke të ndalte operacionet kundër kurdëve në juglindje të vendit dhe kthimin në tryezën e negociatave.
Gjithsej 1,128 akademikë nënshkruan deklaratën, e cila tërhoqi kritika të gjera nga qeveria.
Kaya postoi disa fotografi në llogarinë e tij të Twitter duke punuar në një shesh ndërtimi me një mesazh duke thënë: “Ne kurrë nuk do të heqim dorë nga rezistenca, duke shpresuar, duke krijuar dhe bërë përpjekje”.
Kaya ishte një nga 18 akademikët e “shpalljes së paqes”, i cili u shkarkua me Dekretin Nr. 701.
Pavarësisht se u shkarkua nga posti dhe nisjen e hetimeve tre herë për të, ai thotë se nuk ndjen keqardhje për nënshkrimin e deklaratës dhe se do të bënte të njëjtën gjë përsëri.
Deklarata e paqes e frustroi Presidentin Rexhep Tajip Erdogan dhe qeverinë e Partisë për Drejtësi dhe Zhvillim (AKP), duke çuar në ndëshkim ndaj akademikëve. Disa nga fyerjet që Erdoani përdorte kundër tyre përfshinin “të ashtuquajturit intelektualë”, “një tufë të quajtur intelektualë”, “tradhtarë” dhe “kopje të përafërta të intelektualëve”.
Qindra akademikë që nënshkruan deklaratën u arrestuan kur policia bastisi shtëpitë dhe zyrat e tyre në të gjithë Turqinë pas shpalljes së deklaratës më 11 janar 2016, ndërsa qindra prej tyre u larguan nga puna.
