Besimi se vaksina MMR (fruthi, shytat dhe rubeola) lidhet me autizmin, ka bërë që shumë prindër të mos vaksinojnë fëmijët e tyre , e këta të fundit të rrezikohen nga viruse që mund t’u marrin jetën.
Ende shumë prindër nuk e kuptojnë rëndësinë e vaksinimit të fëmijëve të tyre dhe Organizta Botërore e Shëndetit ka raportuar një rritje të madhe të rasteve të fruthit në të gjithë Evropën . Në vetëm gjashtë muaj janë numëruar më shumë se 41,000 raste të fruthit dhe është vlera më e lartë shënuar në dekadën e fundit.
“Ne po shohim një rritje dramatike të infeksioneve dhe shpërthimeve të zgjatura”, tha Dr Zsuzsanna Jakab, drejtori rajonal i OBSH për Evropën. “I bëjmë thirrje të gjitha vendeve që menjëherë të zbatojnë masa të përshtatshme për të ndaluar përhapjen e mëtejshme të kësaj sëmundjeje.”
Instituti i Shëndetit Publik dhe Ministria e Shëndetësisë nuk vonoi dhe u bëri thirrje të gjithë prindërve shqiptarë për të vaksinuar fëmijët sipas kalendarit të vaksinave.
Në një postim në rrjetet sociale, ISHP dhe ministria bëjnë thirrje: “Fruthi mund të bëhet sëmundje serioze! Mbroni fëmijët nga fruthi nëpërmjet vaksinës Fruth – Rubeolë – Shyta, sipas kalendarit kombëtar të vaksinimit.