Maurizio Sarri e ka filluar në mënyrën më të mirë aventurën e tij në Premier League, teksa ka arritur të marrë maksimumin e pikëve me Chelsean, në dy ndeshjet e para të kampionatit, duke mposhtur fillimisht Huddersfieldin në transfertë dhe më pas Arsenalin në “Stamford Bridge”.
Tekniku italian ka arritur t’i rikthejë entuziazmin një grupi futbollistësh, që ishin mërzitur në dy sezonet e fundit me Antonio Conten dhe po shijon momentin e tij në Londër, gjë që e ka konfirmuar edhe sot në konferencën për shtyp para ndeshjes me Newcastle-n.
“Kam pak më tepër se një muaj këtu dhe po argëtohem vërtetë shumë. Në Itali gjithçka është një luftë dhe para ndeshjes ka shumë tension. Nëse atje shkon rezultati 2-0, nuk ka më surpriza, ndërsa këtu gjithçka është një festë deri në minutën e 90’. Preferoj shumë këtë mënyrë të të përjetuarit të futbollit, pasi është vërtetë e rëndësishme për një trajner, të drejtosh në të tilla kushte”, deklaroi Sarri.
Ish tekniku i Napolit është sulmuar sërish nga presidenti i napolitanëve, Aurelio de Laurentis, por këtë herë Sarri zgjodhi një mënyrë diplomatike për të thumbuar ish bosin e tij dhe të t’i dhënë fund polemikave.
“Mua nuk më mungon De Laurentiis aspak, ndaj nuk kam ndërmend të flas për të. Përkundrazi atë e ka marrë malli, ndaj flet gjithmonë për mua. Është e vërtetë që te Napoli nuk fituam asgjë, por kishim përballë një Juventus që ka fituar gjithçka në vitet e fundit në Itali. Megjithatë kemi vendosur një rekord prej 91 pikësh në sezon, që nuk janë pak. Madje dua të falënderoj Benitezin, pasi kur e zëvendësova te Napoli, gjeta kushtet ideale për të vijuar punën”, mbylli deklaratën e tij Sarri.
