Fillimi i merkatos së verës pa Kukësin të bënte një lëvizje të cilën në klubin verilindor e cilësuan si hapin e parë të përforcimit të skuadrës. Bëhej fjalë për brazilianin Roxher Xhunio Rodrigues, i cili firmosi me skuadrën e Kukësit dhe shihej si një armë më shumë në dispozicion të trajnerit Pakult, i cili drejtonte asokohe ekipin.
Por Roxher nuk e pa askush në fushën e lojës, pasi braziliani as nuk ia doli të bëhej pjesë e 18-shes së lojtarëve në asnjë nga ndeshjet europiane të Kukësit. Ai u hoq shpejt nga lista e futbollistëve të federuar për Europën dhe u bë e qartë se në radhët e këtij klubi nuk kishte hapësira për të.
Lojtari është rishfaqur sot, por si pjesë e Kastriotit. Klubi ka bërë të ditur se ka siguruar huazimin e tij për këtë sezon, duke e marrë nga radhët e Kukësit pasi mendon se mund ta ndihmojë në rrugëtimin për të siguruar mbijetesën në Superiore.
“Prej ditës së sotme, Roger Junio Rodrigues, është pjesë e Kastriotit. Mesfushori me tipare sulmuese, vjen i huazuar nga Kukësi, dhe për 1 sezon do të jetë pjesë e Kastriotit”, shkruhej në njoftimin e Kastriotit që zyrtarizoi marrëveshjen.
