Të paktën dy hektarë me pisha dhe shkurre janë djegur në pyllin e Semanit si pasojë e një zjarri që perfshiu këtë zonë gjatë ditës së sotme.
Mësohet se në vendngjarje ndodhen 4 makina zjarrfikëse të cilat po punojnë për neutralizimin e flakëve.
Aktualisht zjarri është nën kontroll, por gatishmëria është maksimale. Flakët e zjarrit janë në një zonë të pyllëzuar dhe nuk ka rrezik për banesat.
Nga hetimet paraprake dyshohet se shkak i zjarrit ka qenë pakujdesia e pushuesve dhe nuk është i qëllimshëm.
Gjithashtu mësohet se drejt vendngjarjes ka mbërritur edhe prefekti i qarkut Fier Vasil Bregu, i cili u ka bërë thirrje qytetarëve të tregohen të kujdesshëm. Prefekti ka thene se nëse situata përkeqësohet, do kërkohet ndihma e helikopterve.
