Nga 110 mijë familje të varfra shqiptare që merrnin ndihmë ekonomike nga qeveria, në listë kanë mbetur vetëm 52 mijë.
Largimi i tyre u bë me skemën e re, të hartuar me ndihmën e Bankës Botërore.
Nga lista janë hequr familje që kanë vërtetë nevojë, për shkak se janë bërë viktima të verifikimeve që mundëson sistemi kompjuterik.
Lam Xhipi jeton në kushte të vështira ekonomike, bashkë me bashkëshorten dhe djalin e tij të vetëm. Një nga burimet kryesore për familjen e tij, për më shumë se dhjetë vjet, ka qenë ndihma ekonomike.
“Më prenë në besë. Shkova në bashki për të marr ndihmën më thanë ta kanë ndaluar, arsyen nuk e di”, tregon ai për Top Channel.
Familja Xhipi, e cila tani jeton vetëm me një pagesë invaliditeti prej 10 mijë lekësh në muaj, është një nga viktimat e shumtë të skemës së re të ndihmës ekonomike.
Skema bazohet në një sistem kompleks pikëzimi dhe synon të pastrojë listat nga familjet që përfitojnë pa të drejtë. Por, kriteret e ashpra dhe procedurat burokratike kanë skualifikuar edhe familje që jetojnë në mjerim.
Numri i familjeve që merrnin ndihmë ekonomike në katër muajt e parë u ul me 20 mijë, ndërsa krahasuar me vitin 2013, ai është përgjysmuar nga 110 mijë që ishin në 52 mijë.
Vetë Banka Botërore pranon se skema e re mund të ketë hequr ndihmën për shumë familje të varfra. Në një raport të fundit, ajo madje pohon se është në negociata me qeverinë për të shtuar më shumë familje në skemë.
