Rafinha Alcantara, futbollisti i Barcelonës që gjysmën e dytë të sezonit të kaluar e luajti te Inter, gjatë ditës së djeshme ka qëndruar pranë telefonit duke pritur një telefonatë që nuk erdhi kurrë nga zikaltërit.
Tani që merkato në Itali u mbyll, (e premte ora 20:00), e ardhmja e 25-vjeçarit që fitoi zemrat e ziklatërve është në udhëkryq. Në fakt Barcelona do të kishte qenë e gatshme të negocionte me Interin, por drejtuesit e skuadrës italiane zgjodhën opsione të tjera në vend të brazilianit.
Për mesfushorin gjatë merkatos ka patur disa oferta nga “Premier League”, por ai i refuzoi me shpresën se mund të rikthehej në “San Siro”, ndërsa tashmë mund të mbetet pjesë e Barcelonës, ku do të hasë në një rivalitet shumë të madh. Vetë trajneri Valverde u shpreh se beson te Rafinha, por nuk dha garanci nëse lojtari do të mbetet në Katalunjë edhe për sezonin në vijim.
“Rafinha është një futbollist i Barcelonës dhe unë besoj te aftësitë e tij. Gjithsesi nuk e di a do të vijojë të luajë këtu edhe pas 31 Gushtit”, deklaroi trajneri i Barcelonës.
Franca, Spanja dhe Gjermania janë destinacionet e mundshme për Rafinhën, nëse largohet nga Barcelona, por deri tani asnjë klub i madh nuk ka shprehur interes për të dhe për më tepër, futbollisti nuk preferon një tjetër huazim, pa pasur garancinë e një transferimi final.
