Tregu i këmbimit valutor duket se do të mbyllë këtë javë pa regjistruar luhatje domethenëse. Pas forcimit të lekut ditën e enjte, sot valutat e huaja si dollari amerikan dhe euro kanë rezistuar në nivelet e tyre.
Euro vijon të këmbehet për 125.2 lekë në shitje dhe 126 lekë në blerje. Po ashtu edhe dollari amerikan mbetet i fiksuar në kuotat e 110 dhe 111 lekëve për njësi. Megjithatë për dollarin mund të ketë një luhatje pas takimit SHBA-Kinë mbi tarifat e mallrave.
Sa i takon valutave të tjera, paundi britanik ka humbur sot 0.3 lekë për njësi, duke zbritur në kuotën e 139.7 lekëve. Stërlina ndodhet në një pikë të ulët të 14 muajve të fundit edhe në tregjet ndërkombëtare, pavarësisht të dhënave pozitive që vijnë nga shitjet.
Një zhvlerësim me 0.6 lekë për njësi ka regjistruar franga zvicerane, e cila sot këmbehet për 110.2 lekë. Ndërsa dollari kanadez ka pasur një rënie me të butë me 0.2 lekë për njësi, tashmë në kuotën e 82.5 lekëve për njësi.
Në anë të kundërt ndërkohë po ecën lira turke, e cila pas disa lajmeve të fundit pozitive ka arritur të rifitojë disa pikë si në tregjet botërore, ashtu edhe në tregun tonë vendas. Lira turke sipas raportit të fundit të Bankës së Shqipërisë këmbehet për 19.16 lekë për njësi, duke fituar plot 0.9 lekë për njësi krahasuar me ditën e mëparshme.
Gjatë ditëve të fundit grafiku i ecurisë së lirës në raport me lekun ka ardhur vetëm në rritje, megjithëse niveli aktual është shumë larg atij të fillimvitit, kur këmbehej për 29 lekë për njësi.
EUR/ALL 125.20 -126.00
USD/ALL 110.00 -111.00
GBP/ALL 139.70 – 140.50
AUD/ALL 79.70 – 80.50
CAD/ALL 83.50 – 84.50
CHF/ALL 110.20 – 111.20
