Teksa maturantët që plotësuan Formularin A2 janë në pritje të rezultatit final, të tjerë kandidatë presin t’i bashkohen garës në universitete.
Bëhet fjalë për maturantët e vjetër, ata që nuk kaluan dot vitin shkollor apo që mbetën në një nga provimet dalëse, si dhe nxënësit që kanë përfunduar arsimin e mesëm jashtë vendit.
Për të qenë pjesë e konkurrimit për të zënë një vend në universitet, ata duhet të shlyejnë më parë detyrimet e Maturës Shtetërore. Ministria e Arsimit ka publikuar tashmë datat e provimeve me detyrim e me zgjedhje dhe udhëzimin sesi do të zhvillohet sesioni i dytë i testimeve.
DATAT
Ministria e Arsimit ka vënë dy javë në dispozicion, javën e fundit të gushtit dhe të parën e muajit shtator për zhvillimin e provimeve të Maturës Shtetërore, sesioni i dytë. Konkretisht, ato nisin më 27 gusht me provimin e Gjuhës së huaj, ndjekur nga Gjuhë shqipe e letërsia tri ditë më pas.
Provimet me detyrim mbyllen me testin e Matematikës, që mbahet në datën 3 shtator për të vijuar më pas me provimet me zgjedhje, që janë përcaktuar në datën 7 shtator. Provimet e vjeshtës, në të cilat do të futen ata që presin të plotësojnë Formularin A2, kanë të njëjtën strukturë e kohëzgjatje me provimet që u zhvilluan përgjatë muajit qershor. Për tri provimet e para me detyrim ata kanë në dispozicion 2 orë e gjysmë, ndërsa për provimet me zgjedhje 3 orë.
Testi për secilin nga provimet e detyruara përmban 25 pyetje, nga të cilat 13 me përgjigje alternative, që vlerësohen me 13 pikë dhe 12 pyetje me zgjidhje, në total 37 pikë. Ndërsa testi për provimet me zgjedhje përmban 20 pyetje, nga të cilat 10 me përgjigje alternative, përkatësisht të vlerësuara me nga një pikë, si dhe 10 të tjera me zgjidhje që përmbajnë 30 pikë në total.
GARIMI NË UNIVERSITETE
Përpara se të japin provimet që i bëjnë pjesë të konkursit për të fituar një degë në universitetet publike a private, maturantët e vjetër, mbetësit apo ata që vijnë nga jashtë vendit duhet të plotësojnë Formularin A1Z në datat 21-23 gusht, ku caktojnë lëndën me zgjedhje që dëshirojnë të japin në shtator. Kalimi me sukses i tyre iu jep të drejtën e plotësimit të Formularit A2 nga data 15 deri më 20 shtator, për kuotat që mbeten të lira me përfundimin e raundit të parë të garës. Lista e fituesve të dytë do të shpallet në datën 25 shtator, pas kalkulimeve që do të bëjnë universitetet.
