Ujë por me akull, kjo është porosia e shumicës se klientëve që frekuentojnë baret apo lokalet në këto ditë të nxehta gushti. Por kujdes pasi një pjesë e mirë e lokaleve e prodhojnë akullin me ujë nga rrjeti i ujësjellësit pa e filtruar me parë. Sipas specialistëve të higjienës nga anlizat e bëra akullin që tregtohej në disa lokalë në Tiranë ka rezultuar me Echeria Coli
“Nga 36 monitorime që kemi ushtruar gjatë këtij sezoni, 20 prej tyre kanë rezultuar me ngarkesë pozitive të Echeria Colit dhe Coliform Total, por jo me Streptokok Fekal që është edhe përgjegjës për Hepatitin A”, thotë Gimian Dokle, specialist i Higjienës në DSHP, Tiranë.
E. Coli është një bakter i rrezikshëm që mund të shkaktojnë infeksione urinare, gastroenterite dhe diarre. Specialistët e higjienës sqarojnë se me prodhuesit e mëdhenj të licencuar nuk janë hasur probleme. Për të prodhuar akull me kosto të ulët shumë bare dhe restorante kanë blerë vetë aparate prodhimin, por uji që ata përdorin shpesh është i ndotur për shkak të amortizimit të rrjetit të ujësjellësit apo depozitat e tyre kanë vite pa pastruar.
“Kemi dy lloj prodhuesish për akullin. Ata të mëdhenjtë, të licensuar për këtë produkt, mirëfilli dhe të vegjlit që janë baret dhe restorantet.Problemet fillojnë tek prodhuesit e vegjël që kanë aparate të prodhimit të akullit të cilat përdorin ujë të pakontrolluar direkt nga rrjeti , nuk respektojnë protokollin e mirëmbajtjes së kësaj aparturën si dhe nuk verfikojnë sterilitetin e mjeteve mbajtëse dhe ato të shërbimit nga aparati nëpër gota”, thotë Dokle.
Një nga baret e konstatuara me akull të ndotur e shpërndante atë në 12 pika të tjera të rrjetit që ai subjekt kishte ngritur.
“Për këtë subjekt u kërkua ndalimi i menjëhershëm i prodhimit të akullit”, vijon ai.
Prodhimi i akullit në bare dhe restorante ndodh çdo ditë, kjo sipas higjenistëve nuk është një veprim i autorizur me ligj.
“AKU duhet të standartizojë këtë lloj produkti i cili na rezulton se tek prodhuesit e vegjël ka probleme të matshme”.
Në spitalin infektiv mjeket infeksionistë kanë ngritur shqetësimin se disa prej rasteve me hepatit A të shfaqura këto ditë e kanë burimin nga akulli i përdorur në baret dhe restorantet e Tiranës, por për higjenistët ky është thjesht një supozim pasi prania e Streptokokut fekal që shkakton direkt këtë sëmundje nuk është vërtetuar.
