Deputeti demokrat Luan Baçi i ftuar në studion e lajmeve në “Report Tv”, ka folur për procesin e Vettingut, kolapsin me Gjykatën Kushtetuese dhe atë të Lartë, si dhe për bashkëpunimin PD-LSI në opozitë.
Marrë shkas nga afatet kohore kur rinis Vetting-u, Baçi ka thënë se procesi i Vetting-ut, nuk ka qenë objektiv dhe realist.
“Korrikun e vitit të shkuar u dhanë 140 vota, pritshmëritë ishin të larta,. Për mua Vettingu në këtë periudhë, lë shumë për të dëshiruar, ka qenë një marrje në pyetje e gjyqtarëve dhe prokurorëve sikur të ishin në bankën e të akuzuarve. Ata që kanë bërë Vettingun, nuk janë përzgjedhur në bazë të rregullave. Doli Vettingu nga shinat me 6 ligjet e famshme. Po të shohim deri tani, ata që kanë ikur s’janë as më të këqinj as më të mirë nga ata që janë. Trupi i Vettingut janë marrë me pasurinë. Gjykimi është bërë për pasqyrimin e pasurisë, por edhe një mbushje gabim të formularit janë penalizuar gjyqtarë”- tha deputeti i PD.
Baçi është ndalur edhe tek kolapsi i Gjykatës së Lartë dhe asaj Kushtetuese pas largimeve nga sistemi. Deputeti demokrat ka thënë se opozita e kishte parashikuar këtë problem që në shtator të 2016-ës kur mazhoranca kaloi e vetme 6 ligjet.
“Përkundrazi, opozita e parashikoi këtë gjë. E thamë që me 6 ligjet e famshme që i votuan me arrogancë. Reforma në Drejtësi ka dështuar. E votuam që të kthehej besimi, jo të paralizohej sistemi. Me Gjykatën Kushtuese është bllokuar çdo gjë. Populli tani të ankohet tek qeveria, është ajo që vendos. Do paralizohen gjykatat e Apelit. Opozita e ka thënë mendimin e saj, e mbështesim reformën në Drejtësi. Ka nevojë për ulje në tavolinë pa kushte”- u shpreh Luan Baçi.
Baçi ka thënë se LSI-ja është një nga partitë e vogla opozitare që mbështet Partinë Demokratike. Sipas tij, PD e bën dhe e vetme opozitën pasi i ka kapacitetet.
“LSI është bashkëopozitë, është opozitë me PD-në. LSI një nga partitë e vogla të opozitës që mbështet PD, por mazhoranca e frikshme, i vodhën mandatet. Na duhet një opozitë frontale. Partia Demokratike e bën opozitën e vetme, i ka kapacitetet, s’luajnë rol numrat”- deklaroi deputeti demokrat i Fierit, Luan Baçi