Kukësi shkon i plotë në ndeshjen e dytë kundër Qarabagut, pasi nuk ka asnjë dëmtim apo problem në radhët e lojtarëve.
Çdo gjë është shumë mirë, e duke parë dhe lëvrimin e mundshëm të premios, situata dhe klima në ekip është përmirësuar ndjeshëm dhe mëse motivuese.
Infermieria e Kukësit është në ditët më të mira të saj. Kështu, trajneri Cungu ka mundësi zgjedhje për njëmbëdhjetëshin titullar.
Kukësi dhe Qarabag do të diskutojnë një ndeshje vendimtare për fatet e sezonit. Për të dyja klubet, edhe pse nuk kanë as buxhet dhe as objektiva të barabarta, 90-minutëshi i kthimit është shndërruar njëlloj i rëndësishëm, për vetë barazimin pa gola në takimin e parë.
E ndërsa është kështu, ecuria ka shumë rëndësi, por të dyja klubet duhet të dinë një fakt.
Gjyqtari i takimit është i pakursyer në ndëshkim. Peter Kralovic që do të vendosë drejtësi, ka gjykuar dy takime në kualifikueset e Ligës së Kampioneve dhe në total, ka nxjerrë 16 kartonë të verdhë.
Sllovaku 35-vjeçar, i pranuar si arbitër i FIFA-s në vitin 2012, do të ketë asistentë bashkëkombësit Erik Ueis dhe Miroslav Benko.
