Banka e Shqipërisë duket se ka blerë 200 milionë euro nga tregu në muajin qershor për të mos lejuar zhvlerësimin e monedhës europiane.
Ndonëse banka nuk e deklaronin sasinë e eurove që ble në treg, ajo zbulohet nga treguesit e rezervës valutore.
Sipas të dhënave më të fundit zyrtare, rezerva valutore e Bankës së Shqipërisë u rrit me 200 milionë euro vetëm për muajin qershor.
Më konkretisht nga 2.75 miliardë euro që ishte në prill, një muaj më pas rezerva valutore e Bankës së Shqipërisë është rritur në 2.95 miliardë euro.
Rezerva valutore mund të rritet përmes disa instrumenteve.
Por burime konfidenciale i thanë SYRI.net se gjatë muajit të kaluar, e gjithë rritja në rezervë është për shkak të blerjes së eurove në treg për të mbajtur të stabilizuar kursin e këmbimit.
Tregu valutor shqiptar u trondit gjatë këtij viti për shkak të zhvlerësimit të fortë të euros ndaj lekut.
Sipas të dhënave zyrtare krahasuar me fillimin e vitit euro ka rënë me gati 7 për qind ndal lekut dhe nga 134 lekë që këmbehej zbriti nën 125 lekë në maj.
Rënia e fortë e detyroi Bankën e Shqipërisë që në muajin qershor të ndërhyjë me urgjencë, për herë të parë në histori në kursin e këmbimit duke blerë euro nga tregu.
Edhe pse shifra e blerë zyrtarisht është mbajtur sekret të dhënat e rezervës valutore sugjerojnë se vetëm për qershorin BSH ka blerë 200 milionë euro për të mbajtur kursin e euros të stabilizuar në nivelin 125-126 lekë.
Nëse BSH nuk do të kishte blerë këto sasi eurosh nga tregu me gjasa euro do të zbriste në nivele shumë më të ulëta ndaj lekut.
Për shumë ekspertë arsyeja e zhvlerësimit të paprecedentë e euros ndaj lekut janë paratë e drogës.
Vitet e fundit Shqipëria është përballur me rritje eksponenciale të prodhimit dhe trafikimit të kanabisit, por edhe drogave të tjera më të forta. Këto trafiqe mendohet se kanë sjellë sasi të mëdha eurosh në tregun e brendshëm duke tronditur kursin e këmbimit.
