Ministri grek i Mbrojtjes Panos Kammenos deklaroi për BBC-në se ndërtimet pa leje kishin kontribuar në katastrofën më të rëndë të zjarreve në këtë vend. Kamenos deklaroi se ndërtimet e banorëve në mes zonave pyjore ishin një krim që kishin rezultuar në bllokimin e kalimeve. Kamenos u përball me zemërimin e banorëve teksa vizitoi paraditen e kësaj të enjteje zonat e shkatërruara nga zjarri në periferi të Athinës. Kamenos u përball me akuza nga banorët e Matit se qeveria i kishte braktisur ata.
“Na latë vetëm” – i tha një banor Ministrit të Mbrojtjes i cili shoqërohej në këtë vizitë nga kryetari i Bashkisë dhe Kreu i Forcave Ajrore. Një nga dëshmitarët i tha ministrit se kishte shkuar për të kërkuar ndihmë te një rajon zjarrfikës por punonjësit as nuk e kishin idenë se kishte rënë zjarr. Një tjetër banor u ankua se qytetarët ishin këshilluar të futeshin në det për t’i shpëtuar zjarreve në një kohë që pjesa më e madhe ishin të moshuar dhe detin nuk e kishin afër.
