Presidentja e Kroacisë Kolinda Grabar Kitaroviç ka nisur vizitën në Shqipëri. Takimin e parë ajo e ka pasur me homologun e saj Ilir Meta. Pas takimit mes tyre, dy presidentët zhvilluan një konferencë të përbashkët për mediat.
Gjatë fjalës së mbajtur Meta vlerësoi marrëdhëniet mes vendeve ndërsa theksoi ndihmën e vyer që sipas tij Kroacia ka dhënë për integrimin e Shqipërisë në BE.
Por, kjo dalje për mediat nuk mund të mos shfrytëzohej nga gazetarët për të pyetur presidentin Meta lidhur me qëndrimin e tij për negociatat me Greqinë për ‘Detin’ dhe çështjet e tjera. Ai tha se do të përmbushë detyrën e tij për mbrojtjen e Kushtetutës.
“Dëshiroj të theksoj angazhimin tim të plotë në respekt të Kushtetutës por edhe të frymës konstruktive në marrëdhëniet me fqinjët. Është gjithashtu e rëndësishme të them që ky është një proces që duhet të vijohet në barazinë e palëve në raport me të drejtën ndërkombëtare, dhe sigurisht edhe në respekt të Kushtetutës. Do bëj gjithçka për të përmbushur detyrimet në mënyrë konstruktive, në respekt të Kushtetutës e transparencës si me qeverinë edhe me Parlamentin”, tha Meta.
Më tej kreu i shtetit u pyet edhe për ngërçin e krijuar në sistemin e drejtësisë pas largimeve masive nga Vettingu.
Meta i bëri thirrje politikës të tregohen bashkëpunues për të gjetur zgjidhje në mënyrë që të dilet nga situata e vështirë si ajo me Gjykatën Kushtetuese.
“Sa i takon reformës në drejtësi e cila është madhore komplekse, dua t’ju siguroj në përmbushjen e detyrimeve kushtetuese që ka presidenti në çështjet e drejtësisë. Dua të theksoj rëndësinë e bashkëpunimit mes qeverisë dhe opozitës për të tejkaluar çdo moment të vështirë apo të paparashikuar që mund të vejë në vështirësi reformën në drejtësi”, tha Meta.
Ndërkohë, presidentja kroate Kitaroviç në fjalën e saj theksoi se mbështetja e Shqipërisë për integrimin do të vijojë. Ajo tha se dy popujt kanë një marrëdhënie të shkëlqyer dhe këtë e tregon bashkëjetesa me komunitetin shqiptar në Kroaci.
Duke kujtuar kohët e vështira Kitaroviç tha se “2500 shqiptarë luftuan për Kroacinë”.
