Donald Trump dhe Vladimir Putin janë ballë për ballë në pallatin presidencial në Helsinki. Samiti mes të dy udhëheqësve filloi, me një vonesë të vogël për shkak të fluturimit të presidentit rus që mbajti në pritje atë amerikan. Duke hyrë në bisedime Vladimir Putin tha: “Është koha për të folur për marrëdhëniet tona. Ka shumë çështje multilaterale në botë që duhet të adresohen”. “Është mirë të jesh këtu me ty,” tha Donald Trump Putinit, duke i shtrënguar dorën. Trump, i ulur në buzë të karriges, bëri disa deklarata të shkurtra me Putinin para takimit, shkruan La Repubblica.it.
Para fillimit të bisedimeve, Trump tashmë kishte lajmëruar , si zakonisht në Twitter: “Marrëdhënia jonë me Rusinë nuk ka qenë kurrë më e keqe, falë shumë viteve të çmendurisë dhe budallallëkut të Shteteve të Bashkuara dhe tani, gjuetisë së shtrigave! “. Nga ana tjetër, Trump e krediton veten si “shpëtimtar” i NATO-s dhe në takimin me presidentin finlandez Sauli Niinistö, sapo arriti në Helsinki, tha se “NATO nuk ka qenë kurrë aq e fortë sa sot”.
Konferenca e përbashkët për shtyp është caktuar në fund të drekës së punës.
Samiti nuk i ka axhendë të paracaktuar, njoftoi këshilltari amerikan John Bolton për Sigurisë Kombëtare, dhe gjithashtu Trump, sapo mbërriti dje në mbrëmje në kryeqytetin finlandez, tha se “pritjet janë të ulëta”, edhe në qoftë se “nga ky takim mund të dalë diçka e mirë “.
Putin arrin në Helsinki i freskët nga suksesi i imazhit të Kupës Botërore, ndërsa Trump përfundon një turne evropian, ku ai shaktoi trazira në samitin e NATO-s, akuzoi Gjermaninë që është “e kontrolluar totalisht” nga Moska për shkak të importeve të gazit rus, e quajti BE një “armike ” dhe e zuri ngushtë kryeministren britanike Theresa May, duke e sulmuar atë në një intervistë përpara se ta lavdëronte në konferencën e përbashkët për shtyp. Departamenti i Shtetit i SHBA ndërkohë ka akuzuar 12 qytetarë rusë me akuza për ndërhyrje në zgjedhjet e SHBA në dëm të Hillary Clinton, kundërshtarja demokrate e Trump. Dhe në Mbretërinë e Bashkuar çështja Novichok ka shpërthyer me helmimin e dy qytetarëve të zakonshëm, për të cilët Londra akuzon Kremlinin.
Dhe pikërisht nga Hillari vjen një mesazh i helmatisur në Twitter: “Kampionati i bukur botëror, një pyetje për Presidentin Trump tani që ai takon Putin. A e dini se në cilën ekip po luan?”
Sulmi ndaj Obamës
Një nga mesazhet tweet të hershme të presidentit amerikan është kundër paraardhësit të tij të Shtëpisë së Bardhë: “Ish presidenti amerikan Barak Obama nuk bëri asgjë për ndërhyrjen e dyshuar të Rusisë në zgjedhjet amerikane: ai tha se nuk mund të ndodhte, se ai nuk ishte problem i madh”.
