Real Madridi është i gatshëm të formalizojë një ofertë stratosferike për të blerë shërbimet e sulmuesit të Tottenham Hotspur, Harry Kane, i cili është në rrugën e duhur për t’u kurorëzuar golashënuesi më i mirë në Botërorin 2018 të Rusisë, edhe pse Anglia e tij u rendit në vend të katërt. Sipas mediave britanike si “The Sun”, ekipi i “Los Blancos” po përgatit një ofertë që përfshin Gareth Bale, një ish-lojtar i ekipit të Londrës, plus 150 milionë euro për të bindur drejtuesit e ekipit anglez të shesin një nga figurat e tyre më të mëdha. Megjithatë, sipas këtyre burimeve në Tottenham operacioni nuk është i qartë, veçanërisht për shkak të lehtësisë me të cilën Gareth Bale është dëmtuar në kohët e fundit, gjë që ka një ndikim të drejtpërdrejtë në performancën e tij.
Kjo është një arsye madhore dhe drejtuesit e Spurs i tremb ky fakt, pasi sezonin e kaluar Bale për pjesën më të madhe të sezonit ka qenë i dëmtuar. Real Madridi po kërkon një golashënues, i cili do të kompensojë mungesën e 50 golave në sezon që ylli portugez Cristiano Ronaldo ka mesatarizuar gjatë nëntë viteve të tij në “Santiago Bernabeu” dhe Kane mund të jetë një nga opsionet më të mira në këtë drejtim. Megjithatë, rinovimi i tij i fundit deri në vitin 2024 është një vështirësi e shtuar për aspiratat e “Los Blancos”. Projekti i Tottenham bazohet pikërisht te Kane dhe Real Madridi do ta ketë tepër të vështirë të sigurojë shërbimet e sulmuesit anglez. Për më tepër ata duhet t’i mbushin mendjen edhe kapitenit të Anglisë, i cili është tepër i lumtur nga jeta në Londër dhe për më tepër është pjesë e një ekipi kompetitiv që ka ambicie të mëdha.