Pas një udhëtimi maratonë, fillimisht me autobus nga Laçi në Korçë, e më pas në Selanik dhe direkt e në Larnaka, kurbinasit kanë mbërritur dje të sfilitur në vendin ishullor. Të enjten në orën 19:00 në stadiumin “Antonis Papadopulos” do të luhet Anorthosis-Laçi, por fusha e stadiumit të klubit qipriot është dënuar nga UEFA me dy ndeshje pa spektatorë.
Kësisoj, sot dyert e impiantit do të qëndrojnë të mbyllura. Mirëpo, sipas mediave qipriote, UEFA ka bërë njëfarë tolerance sa u përket shikuesve VIP që do të lejohen ta shikojnë ndeshjen nga tribuna qendrore e stadiumit. Përveç ekipeve dhe stafeve teknike, UEFA ka lejuar që të marrin pjesë në stadium 75 përfaqësues të klubit qipriot, që normalisht mund të jenë sponsorë të Anorthosis, familjarë të futbollistëve dhe zyrtarë të administratës. E veçanta është se UEFA i ka dhënë më shumë të drejtë Laçit për të marrë me vete një numër të caktuar njerëzish në këtë udhëtim në Qipro.
Sipas portalit “kerkida.net”, klubi i Laçit ka të drejtë të sjellë në Larnaka deri në 200 vetë, ku përfshihen lojtarët, stafi, sponsorët e ekipit, zyrtarë të klubit etj. Mirëpo, kurbinasit nuk do të jenë as 50 në Qipro. Gjithsesi, ky detaj ka pak rëndësi, pasi të besuarit e trajnerit Besnik Prenga do të kërkojnë të shfrytëzojnë maksimalisht momentin jo të mirë që po kalon Anorthosis. E vetmja mungesë për bardhezinjtë është mbrojtësi i krahut të djathtë, Abdurrahman Fangaj, i cili nuk e ka kaluar ende dëmtimin dhe nuk u grumbullua.
