Autoritetet turke urdhëruan shkarkimin e më shumë se 18,500 punonjësve shtetëror, duke përfshirë zyrtarë të policisë, ushtarakë dhe akademikë, me një dekret të botuar të dielën.
Gazeta Zyrtare tha se 18,632 persona u shkarkuan duke përfshirë 8,998 policë në dekretin emergjent për shkak të dyshimeve për lidhje me organizata terroriste dhe grupet që “veprojnë kundër sigurisë kombëtare”.
Në listën e shkarkimeve u përfshinë edhe .077 ushtarakë dhe 1,949 personel të forcave ajrore dhe 1,126 nga forcat detare.
Gjithashtu u shkarkuan edhe 1.052 nëpunës civilë nga Ministria e Drejtësisë dhe institucionet e lidhura me të, si dhe 649 nga xhandarmëria dhe 192 nga roja bregdetare.
Autoritetet gjithashtu shkarkuan 199 akademikë, sipas dekretit të ri, ndërsa 148 punonjës të shtetit nga ushtria dhe ministritë u rikthyen në detyrë.
Turqia ndodhet në një gjendje të jashtëzakonshme që nga korriku i vitit 2016, pas grushtit të dështuar të shtetit.
Periudha i ka shërbyer Presidentit Rexhep Tayp Erdogan për të kryer pastrime dhe burgime të gjera. Mbi 50 mijë njerëz janë nëpër burgje, dhe rreth 200 mijë të tjerë janë shkarkuar nga puna.
Qeveria ka premtuar se do të shfuqizojë gjendjen e jashtëzakonshme dhe periudha i shërben qeverisë të kryej pastrimet e fundit të zyrtarëve që nuk janë në shërbim të saj.
Emergjenca është rinovuar shtatë herë dhe periudha e fundit zyrtarisht pritet të përfundojë më 19 korrik.
Turqia akuzon predikuesin mysliman të SHBA Fethullah Gulen për orkestrimin e grushtit të tentuar. Shumica e të pushuarve nga emergjencat akuzohen për lidhje me Gulenin.
Gulen mohon fuqishëm lidhjet me grushtin e shtetit dhe këmbëngul që lëvizja e tij është një organizatë paqësore.
Dekreti i së dielës mbyll 12 shoqata në të gjithë vendin, si dhe tre gazeta dhe një kanal televiziv.
Mbrojtësit e të drejtave të njeriut duke përfshirë Amnesty International i kanë konsideruar spastrimet si arbitrare.
Më parë këtë vit, qeveria tha se më shumë se 77,000 njerëz ishin arrestuar lidhur me lidhjet e dyshuara me Gulenin.
