Meteorologët parashikojnë ditë me temperatura të larta, alternuar edhe me ditë që do të ketë shtrëngata, kryesisht pasditeve. Sipas Meteoalb, sot vijon dominimi i motit të kthjellët me vranësira gjatë pasdites në ekstremet Veri-Verilindje ku shfaqet mundësia për shira të izoluar. Të shtunën dhe të dielën, bregdeti mbetet me kthjellime dhe vranësira kalimtare; më të dukshme pasditen e së dielës, kryesisht në Veriperëndim.
Ndërsa zonat e ulëta, por kryesisht ato malore, gjatë të dy pasditeve të fundjavës do të kenë vranësira të shpeshta dhe shira të përkohshëm të cilët pasditen e së shtunës fokusohen kryesisht në Veri – Verilindje, por pasditën e së dielës, zhvendosen kryesisht në Juglindje dhe pjesërisht në zonat Qendrore të Shqipërisë.
TABLOJA TERMIKE: Sot pritet që temperaturat të ngjiten maksimalisht në 36°C në disa qytete të Ultësirës Perëndimore shqiptare, po ashtu në zonat malore priten temperatura mbi 33°C.
Fundjava sjell freskim të ndjeshëm të motit si pasojë e masave ajrore që vijnë nga Evropa Veriore duke bërë që maksimumi termik në territor të ulet në 32°C, vlera këto tipike të muajit korrik.
Në të njëjtat vlera termike Shqipëria vijon pjesën e parë të javës që vjen, por sërish pas të enjtes pritet rritje e ndjeshme e temperaturave duke kulmuar fundjavën tjetër në vlera maksimale mbi 34°C.
Përsa i përket prezencës së shirave në javën e dytë të korrikut, do të jenë prezente gjatë pasditeve në formën e rrebesheve të shkurtra kryesisht në Veri dhe zonat Lindore, por shumë pak rrezikohen zonat Qendrore, ndërsa bregdeti vijon në kushtet e motit kryesisht të kthjellët.
