Rrëmbeu një vajzë 17-vjeçare para 7 muajsh, kapet autori, por fati i adoleshentes mbetet mister. Policia e Gjirokastrës ka arrestuar Shpëtim Muharremin, 40 vjeç nga Levani i Fierit si autor i rrëmbimit dhe pengmarrjes, shkruan “Panorama”.
Ndalimi i Muharremit është bërë nga Specialistët për Hetimin e Krimeve në Drejtorinë Vendore të Policisë Gjirokastër, në bashkëpunim me Drejtorinë Vendore të Policisë Fier. Arrestimi i 40- vjeçarit vjen 7 muaj pas denoncimit të bërë nga prindërit e adoleshentes, ndërsa kjo e fundit ende rezulton e zhdukur. Sipas të dhënave, 17- vjeçarja me iniciale Sh.Xh, banuese në lagjen “Zinxhira” në Gjirokastër, e cila i përket komunitetit rom, është rrëmbyer në Sarandë. Burime konfidenciale pohojnë se Shpëtim Muharremi ka deklaruar se vajzën e ka marrë si nuse për të birin.
Por nga ana tjetër, i biri i Muharremit rezulton të jetë me sindromën down. Nga kontrolli i ushtruar nga Policia, ka rezultuar se adoleshentja nuk ndodhet në shtëpinë e 40-vjeçarit, edhe ky i fundit anëtar i të njëjtit komunitet.
Denoncimi i prindërve të adoleshentes është bërë më 7 dhjetor të vitit të kaluar. Janë dashur plot 7 muaj kohë për uniformat blu që të bëhet identifikimi i personit që dyshohet se është autori i rrëmbimit të 17-vjeçares dhe që e mban peng, sipas Policisë, për motive të dobëta.
“Pas një pune të mirorganizuar dhe një bashkëpunimi efektiv u bë e mundur ndalimi i shtetasit: Shpëtim Muharremi, 40 vjeç, banues në Levan, Fier. Ndalimi i tij u bë pasi nga denoncimi i prindërve të një shtetaseje 17-vjeçare, banuese në Gjirokastër më datë 07.12.2017, si dhe veprimeve hetimore të deritanishme, dyshohet se është autori i rrëmbimit të 17-vjeçares dhe që e mban peng për motive të dobëta.
Vazhdojnë hetimet për lokalizimin dhe gjetjen e të miturës si dhe zbardhjen e plotë të ngjarjes”, bën të ditur Policia. Ndërsa për 40- vjeçarin kanë nisur hetimet për veprën penale “Rrëmbimi ose mbajtja peng e personit” dhe çështja i ka kaluar Prokurorisë pranë Gjykatës së Shkallës së Parë Gjirokastër për veprime të mëtejshme.
Tashmë, kanë nisur kërkimet për 17-vjeçaren, pasi ka dyshime të forta se ajo mund të jetë përdorur për qëllime prostitucioni nga ana e 40- vjeçarit. Gjithashtu nuk përjashtohet dyshimi se ajo mund të jetë larguar prej tij dhe jeton me dikë tjetër, teksa ka zgjedhur të mos lajmërojë familjen e saj. Por këto mbeten ende pista dyshimi dhe deri në momentin e gjetjes së saj nuk ka një të dhënë zyrtare për fatin e saj.
