Ish-kryeministri Berisha e ka quajtur krim qeveritar projektligjin që i hap rrugën shembjes së Teatrit Kombëtar.
Një një prononcim për mediat jashtë sallës së parlamentit Berisha tha se sot duhet të kishte një projekt nga qeveria në lidhje me rekomandimet e BE por në vend të tij, paraqitet ligji i ekzekutimit të një simboli kombëtar. Për Berishën qëllimi është vjedhja.
“Sot po konsumohet krim qeveritar nga mafia qeveritari. Jashtë çdo rregulli dhe moral në momentin kur BE hodhi poshtë kërkesën për hapjen e negociatave për Shqipërinë dhe i shtyu ato për në fund të vitit 2019 dhe iu garantoi deri në gjysmën e dytë të 2021 në vend që të paraqitet sot një program, një plan i studiuar për të adresuar 13 kushtet e caktuara nga Këshilli i Ministrave paraqitet ligji i ekzekutimit të një simboli të arrirë kombëtar, Teatrit Kombëtar. Nga një njeri i cili udhëhiqet nga urrejtja patologjike ndaj çdo gjëje në tërësi por veçanërisht ndaj çdo gjëje të arrirë në artin dhe kulturën shqiptare pasi vetë ka mbetur në komplekset primitive të një adoleshenti të droguar që shkarravit.
Kjo lukuni ka vetëm një axhendë, të vjedhë çdo ditë e çdo muaj. Kjo që po ndodh me teatrin është vetëm vjedhje”, deklaroi Berisha.
