Ligji kundër importimit, tregtimit dhe prodhimit të qeseve plastike ka hyrë në fuqi dy muaj pas publikimit në fletoren zyrtare, e megjithatë, situata në treg mbetet e njëjtë.
Sipas të dhënave zyrtare nga Qendra Kombëtare e Biznesit, në vend janë të regjistruara 70 kompani që prodhojnë dhe tregtojnë plastikë. Por, kjo është vetëm një shifër e deklaruar.
Në terren ka subjekte që operojnë në paligjshmëri, e që shesin edhe qese plastike në mënyrë të paligjshme. Shumë pak biznese rezultojnë të kenë nisur aplikimin e varianteve të zëvendësimit të qeseve plastike.
Një nga alternativat për të zëvendësuar qeset plastike është përmes një traste e cila kushton 150 lekë, por ekziston edhe një variant tjetër i qeses e cila është mbi 35 mikron, shumë më e trashë se qeset e vjetra dhe që shkatërrohet brenda 2 vitesh, jo më brenda 300 viteve si qeset e dikurshme.
Por shumica e tregtarëve akoma nuk i kanë ‘përqafuar’ këto alternativa, pasi qeset organike dhe të riciklueshme kushtojnë jo pak për ta.
