Në “Luzhniki Stadium” u luajt ndeshja e vlefshme për 1/8-at e finaleve të Botërorit mes Rusisë dhe Spanjës.
Për herë të parë në këtë Botëror fituesi u vendos me penallti, ku më të saktë u treguan rusët, që fituan 4-3 dhe kualifikohen në çerekfinale (gabuan Koke dhe Aspas).
Koha e rregullt u mbyll në barazim 1-1, me dy golat që u shënuan në pjesën e parë.
Spanjollët kaluan të parët në avantazh nga autogoli i Ignashevich, ndërsa rusët baraspeshuan gjithçka me anë të Dzyuba, i cili u tregua i saktë nga pika e bardhë.
Në pjesën e dytë, me gjithë përpjekjet e spanjollëve, rezultati nuk ndryshoi dhe për të përcaktuar ekipin që do të kualifikohet për në çerekfinale nevojitet koha shtesë.
Edhe shtesat dy herë nga 15 minuta nuk prodhuan gol, ndaj u deshën penalltitë që të vendosnin ekipin që do të vazhdojë aventurën në këtë Botëror.
Rusët iu falën gjuajtjeve të 11-metërshave për të vazhduar më tej, ndërsa ishin të pafat spanjollët, duke u eliminuar nga ky kompeticion.
