Këshilli i Ministrave ka vendosur gjatë mbledhjes së fundit për rishpërndarjen e numrit të punonjësve organikë në institucionet qendrore. Ndryshimet prekin një numër të madh vendesh në 5 prej ministrive dhe në një prej agjencive të shtetit.
Ministrisë së Financave dhe Ekonomisë do t’i hiqen 21 punonjës nga Inspektorati Shtetëror i Mbikëqyrjes së tregut, duke e çuar numrin e përgjithshëm të punonjësve të kësaj ministrie në 5705 veta.
16 vende pune do të reduktohen edhe nga Agjencia Kombëtare e Shoqërisë së Informacionit, duke e çuar numrin total të shkurtimeve për dy institucionet në 37 veta.
Katër nga këto vende do t’i shtohen Ministrisë së Bujqësisë dhe Zhvillimit Rural, përkatësisht në Agjencinë e Zhvillimit Bujqësor. 9 punonjës do t’i shtohen edhe Ministrisë së Shëndetësisë dhe Mbrojtjes Sociale, ndërsa 3 vende të tjera i shtohen Ministrisë së Brendshme.
Ndërkohë, shtimi më i madh i punonjësve prej 21 vendesh shkon për Inspektoratin Shtetëror të Mjedisit, Pyjeve, Ujërave dhe Turizmit, nën varësinë e Ministrisë së Turizmit dhe Mjedisit.
Rishpërndarja e mëparshme brenda institucioneve shtetërore dy javë më parë, gjithashtu kishte shtuar një numër prej 45 punonjësish për inspektoratin e mësipërm, i cili duket se do të ketë një punë intensive në kuadër të aksioneve në vijim.
