Një dokument i brendshëm i Delegacionit Evropian tregon se Ambasadorja Romana Vlahutin ka qenë e informuar që prej marsit, që Këshilli i Lartë Gjyqësor dhe Këshilli i Lartë i Prokurorisë do të mund të ngrihen vetëm “në fund të vitit 2018 ose më vonë”.
Dokumenti i brendshëm për “Status Quo-në e Zbatimit të Reformës në Drejtësi”, i datës 29 mars 2018 është hartuar nga misioni i BE-së për ndihmë juridike EURALIUS, dhe shkruan se “ekziston rreziku që vetingu i të gjithë kandidatëve me prioritet të vazhdojë ende dhe për shumë kohë”.
“Përveç kësaj, nëse jo mjaftueshëm gjyqtarë/prokurorë që kanë aplikuar për në Këshilline Lartë Gjyqësor (KLGj) dhe Këshillin e Lartë të Prokurorisë (PJK) kalojnë procesin e vetingut, organet përgjegjëse, dmth. Gjykata e Lartë dhe Prokuroria e Përgjithshme, duhet të hapin përsëri një thirrje për kandidatë të tjerë. Këta kandidatë do të duhej sërish të verifikoheshin [kalonin vetingun] […]. Kjo mund të marrë muaj të tjerë dhe të çojë në krijimin e Këshillave [KLGJ ose KLP] vetëm në fund të vitit 2018 ose më vonë.”
Kjo është një deklaratë e jashtëzakonshme, sidomos po të kemi parasysh që disa zyrtarë vendas e ndërkombëtarë kanë bërë deklarata të bujshme që Prokuroria Speciale (SPAK) dhe Byroja Kombëtare e Hetimeve (BKH) do të formohen para verës së vitit 2018. Si SPAK dhe BKH, ashtu si dhe Prokurori i ri i Përgjithshëm legjitim, mund të formohen dhe zgjidhen vetëm pasi KLP të jetë ngritur dhe të ketë filluar të funksionojë.
Ambasadori i SHBA Donald Lu deklaroi në fillim të prillit se “Prokuroria Speciale (SPAK) dhe Byroja Kombëtare e Hetimeve (BKH) do të formohen këtë verë”.
Gjithashtu në fillim të prillit, Ministri i Brendshëm Fatmir Xhafaj bëri të njëjtën deklaratë: “në verë SPAK dhe BKH do të jenë gati”.
Si ambasadori Lu, ashtu dhe Ministri Xhafaj mbajnë të tilla poste që duhet të ishin të mirëinformuar për përmbatjen e këtij dokumenti të EURALIUS. Së bashku me Ambasadoren e BE-së Romana Vlahutin, Ambasadori Lu është në Bordin Menaxhues të Operacionit Ndërkombëtar të Monitorimit (ONM) që mbikëqyr vetingun. Ndërsa ministri Xhafaj, së bashku me Ambasadoren Vlahutin, merr pjesë në takimet e Komitetit Drejtues të EURALIUS-it.
Pra, kjo na lë në dy opsione: Ose Ambasadorja e BE-së Vlahutin nuk e ka ndarë përmbajtjen e dokumentit të hartuar nga EURALIUS me bashkëpunëtorët e saj më të ngushtë në Reformën e Drejtësisë, Ambasadorin e SHBA-së Lu dhe Ministri Xhafaj, ose Lu dhe Xhafaj me ndërgjegje dhe me qëllim kanë mashtruar shqiptarët dhe ndërkombëtarët në lidhje me përparimin e reformës së drejtësisë./Exit.al
