Kjo ndeshje do të përcaktojë fatin e Islandës, duke parë se Kroacia ka siguruar kualifikimin në 1/8-at e Kupës së Botës dhe vendin e parë në Grupin D.
Islandezët kanë befasuar botën e futbollit në Euro 2016, ku kanë eliminuar Anglinë në 1/8-at para se të pësonin të njëjtin fat në çerekfinale, në ndeshjen kundër Francës.
Humbja 2-0 e pësuar në ndeshjen e dytë të grupit, të luajtur kundër Nigerisë, i ka dhënë një goditje të fortë shpresave të tyre për të kaluar më tej, por gjithçka mund të ndryshojë me një fitore kundër kroatëve.
Për më tepër, ata kanë fituar grupin kualifikuese të Kupës së Botës, duke lënë pikërisht Kroacinë mbrapa. Islanda e mbylli grupin me 22 pikë, Kroacia me 20. Edhe pse historia e përballjeve direkte nuk është në favor të nordikëve, ata e kanë fituar ndeshjen e fundit kundër kroatëve me një gol të shënuar në minutën e 90-të.
Një tjetër aspekt që shkon në favor të islandezëve ka të bëjë me faktin se Kroacia mund të vendosë të përdorë rotacionin, duke parë se e ka fituar grupin.
Këto dy skuadra kanë një histori, me Islandën që i “vodhi” vendin e parë Kroacisë në grupin kualifikues, ndërsa bardhekuqtë i kanë eliminuar ata në ndeshjen kualifikuese “play off” për Botërorin e 2014-ës.
Lideri i kroatëve ka qenë Luka Modric, i cili po shkëlqen në këtë Kupë të Botës, siç tregoi edhe me golin e mrekullueshëm të realizuar kundër Argjentinës së Leo Messi-t.
Ndërkohë, Alfred Finnbogason ka qenë autori i golit të vetëm të shënuar nga Islanda në këtë Botëror. Gjithashtu, ai ka shënuar tre gola në katër ndeshjet e fundit me kombëtaren.
Shifra dhe Fakte
– Kroacia ka dominuar në përballjet direkte me Islandën ( fitore, 1 barazim, 1 humbje) dhe të katër fitoret kanë ardhur me të paktën dy gola diferencë.
– Tre kartonë të kuq janë dhënë në katër ndeshjet e fundit që janë luajtur mes këtyre dy përfaqësuesve.
– Ky është Botërori i pestë për Kroacinë, por kjo mund të jetë hera e parë që ata fitojnë çdo ndeshje të fazës me grupe.
