Franca kryeson Grupin C me 6 pikë të plota dhe është kualifikuar për në fazën tjetër të Botërorit, por nesër do të luajë ndaj Danimarkës, që renditet e dyta dhe që i mjafton një pikë për të shkuar më tej. Një barazim do t’u bënte punë të dyja skuadrave, por trajneri i “gjelave” Didier Deschamps shprehet se nuk do të luajë për të marrë një pikë, pasi ka një ekip që mund të mposhtë çdo rival.
“Unë do të hedh në fushë një ekip kompetitiv. Kam marrë me vete 23 lojtarë dhe kam mundësinë që të bëj disa zëvendësime. Pavarësisht kësaj, nuk do të luajmë për barazimin, por për fitore, pasi synojmë kreun e grupit. Nuk më pëlqen të bëj llogari, pasi asnjëherë nuk dalin ashtu si mendon. Do të luajmë me maksimumin tonë që në fillimin e lojës”, tha Deschamps.
Por trajneri francez konfirmon se do të bëjë disa ndryshime në formacion dhe pritet që Mbappe, Pogba, Tolisso e Matuidi të mos jenë titullarë edhe për shkak se kanë nga një karton të verdhë. “Kam dy rezultate nga 3 në dispozicion për të qenë në vendin e parë në grup. Do t’i jap mundësi disa lojtarëve që të pushojnë dhe të luajnë disa të tjerë”, tha Deschamps. Në fushë nga minuta e parë pritet të jenë Lemar e Dembele.
