Kryetari i opozitës Lulzim Basha ka bërë një deklaratë të fortë sot lidhur me 3.4 milionë eurot e kapura në portin e Durrësit, që po hynin kontrabandë në Shqipëri. Basha akuzoi Sekretarin e Përgjithshëm të PS, Taulant Ballën, si negociatorin e këtyre parave të njërës prej bandave më të rrezikshme kriminale:
“Mund të them vetëm tre gjëra, – tha ai. – E para, që paratë janë të një prej bandave më të rrezikshme të trafikut të drogës, aktive, kryesisht në zonën e Elbasanit dhe në të gjithë Shqipërinë. E dyta, Taulant Balla kishte marrëveshje për të garantuar për të garantuar hyrjen e këtyre parave pa problem në Shqipëri dhe e treta, Policia shqiptare ka qënë nën presionin e një prej partnerëve tanë për të vepruar; është një nga vendet partnere që janë spektike përsa i përket kushteve të Shqipërisë për integrimin, ne veçanti luftën kundër krimit dhe korrupsionit“.
Basha shkoi më tej duke bërë lidhjen e fakteve, të cilat siç theksoi, të çojnë tek kryeministri Edi Rama, pastrimi i parave të drogës nëpërmjet ndërtimit të kullave.
“Kemi një ish-Ministër të Brendshëm që është akuzuar; një tjetër që përpiqet të justifikojë nga mëngjesi në darkë vëllanë e tij trafikant dhe tani kemi Sekretarin e Përgjithshëm të PS, kryetarin e Grupit të PS që përpiqet të pastrojë paratë e drogës. 1 milionë e 500 mijëe ka qënë pakti dhe marrëveshja është garantuar nga Taulant Balla. Ky ka hyrë garant, këtë mund t’ju them sot dhe do ta verifikojnë faktet dhe koha”.
I pyetur për deklaratat e Ballës, Basha: “Nuk jam këtu për të komentuar deklaratat e një personi që duhet të ishte para drejtësisë. Pyetja është ku shkojnë këto para?
Çfarë i lidh Saimir Tahirin, Fatmir Xhafajn, Taulant Ballën, Erion Veliajn përveç Ramës? Paratë për të ndërtuar kullat dhe pastruar paratë e krimit. Kjo është arsyeja pse sot BE pavarësisht punës që kemi bërë ne si opozitë vendos që Shqipëria s’i ka plotësuar kushtet“.
