“Minat do ti shisja”, kështu është shprehur në deklaratën e tij në polici 40-vjeçari Eduard Sinanaj, i arrestuar këtë të shtunë nga policia e Lezhës, pasi në makinën me të cilën lëvizte, u gjeten 6 mina me telekomandë.
Burime pranë grupit hetimor thanë për “Panorama”, se Sinanaj, me banim në Tiranë, ka deklaruar se do ti shiste minat, por jo në Lezhë. 40-vjeçari, thanë të njëjtat burime, nuk ka treguar ndonjë emër specifik të destinacionit të lëndëve shpërthyese.
Burime policore thanë se Eduard Sinanaj, dyshohet se veronte i vetëm, pa qenë pjesë e një grupi të caktuar kriminal. Ai është mbajtur në mbikëqyrje pas informacioneve se ushtronte veprimtari kriminale dhe u arrit të arrestohej në flagrancë këtë të shtunë.
Hetimet janë në vijim për të zbuluar origjinën dhe destinacionin e minave me telekomandë dhe kush mund të jetë tjetër i implikuar në këtë veprimtari.
Zyrtarisht, Policia e Lezhës njoftoi se: “Në aksin rrugor Milot – Lezhë, në vendin e quajtur Ishull Lezhë, 40-vjeçari i dënuar më parë për veprën penale ‘Dhënie ndihme për kalim të paligjshëm të kufirit”, u kap me automjetin e tij tip ‘Peugeot’ që po drejtonte, pasi në bagazh, në një rrotë karroce, kishte fshehur 6 mina me telekomandë të cilat u sekuestruan në cilësinë e provës materiale së bashku me automjetin”.
Operacioni për arrestimin e tij i koduar udhëtimi, ishte një bashkëpunim mes sektorit për hetimin e krimeve në Drejtorinë Vendore të Policisë Lezhë dhe Prokurorisë së Rrethit Gjyqësor Lezhë, njoftoi Policia lokale.
Vepra penale që rëndon ndaj tij është “Trafikim i armëve dhe municioneve” parashikuar nga neni 278/a i Kodit Penal, ndërsa materialet proceduriale iu referuan Prokurorisë së Rrethit Gjyqësor Lezhë për veprime të mëtejshme, shtuan të njëjtat burime.
Nga pamjet e arrestimit të 40-vjeçarit të publikuara nga Policia, u pa se minat ishin fshehur në gomat e automjetit tip “Peugeot”.
