Mateo Kovaçiç shprehet i bindur se Argjentina nuk mund të trembë kurrsesi Kroacinë, në ndeshjen që do të luhet nesër në mbrëmje. Mesfushori kroat i Realit të Madridit thotë se në krahasimin kokë më kokë, Kroacia qëndron më lart se Argjentina, nëse kësaj të fundit i heq Messin.
“Argjentina varet shumë nga Messi, edhe pse ata kanë një ekip të mirë në pozicionet e tjera. Është pikërisht Messi që duhet të përkujdeset për ata thuajse gjatë të gjithë kohës. Ai është një fenomen dhe kjo është e padiskutueshme, sepse mund ta zgjidhë një ndeshje i vetëm në çdo moment. Megjithatë, ne nuk duhet të kemi frikë nga Argjentina, pasi individualisht jemi më të mirë sesa ata, me përjashtim të Messit. Thënë këtë, ne duhet të luajmë siç dimë ne, e jo nën imponimin e lojës së tyre”, deklaroi Kovaçiç.
Të dyja ekipet do të ndeshen për grupin D pas rezultateve kontrastuese të raundit të parë, me Kroacinë që e nisi me fitore ndaj Nigerisë, ndërsa Argjentina u ndal në barazim 1-1 nga Islanda.
