Kancelarja gjermane Angela Merkel deklaroi se emigrimi është një çështje që kërkon një zgjidhje evropiane, duke mos lëshuar terren përballë sfidës së aleatëve të saj bavarezë që kërcënojnë koalicionin 3-mujor.
Debati nisi pasi Merkel refuzoi planet e ministrit të Brendshëm, Horst Seehofer, i cili është nga Bavaria, për të kthyer mbrapsht në mënyrë të njëanshme emigrantët që janë regjistruar në vende të tjera evropiane.
Nëse Merkel do të bënte një kthesë të tillë në politikën me dyer të hapura, goditja për autoritetin e saj do të ishte e fortë, pa harruar rrezikun e madh që do të paraqitej për sistemin pa kufij të Shengenit në një kohë kur tensionet në BE për emigracionin janë të larta.
Në komunikimin e saj të përjavshëm, tre ditë para bisedimeve me Presidentin francez Emmanuel Macron, Merkel rikonfirmoi bindshëm qëndrimin e saj.
“Emigracioni është një sfidë evropiane që kërkon një zgjidhje evropiane. Unë e shoh këtë çështje vendimtare për të mbajtur Evropën të bashkuar”, deklaroi Merkel.
Kancelarja kërkon dy javë kohë që të bëjë marrëveshje me partnerët evropianë si Italia dhe Greqia. Por Unioni Kristian-Social i Seehofer nuk dëshiron të presë dhe thotë se ministrat do të sfidojnë Merkelin të hënën nëse nuk është arritur kompromis.
Kjo mund ta detyrojë Merkelin që të shkarkojë ministrin Seehofer, madje ka zëra për fundin e aleancës 70-vjeçare konservatore parlamentare mes Bavarisë dhe kristiandemokratëve të kancelares.
Pa CSU, partia e Merkelit dhe socialdemokratët humbin shumicën dhe kjo mund të rrezikojë postin e saj, madje edhe të sjellë zgjedhje të parakohshme.
A mund të ketë edhe një kompromis?
Në orët e ardhshme dhe me siguri edhe në fundjavë, Wolfgang Schäuble, president i Bundestagut dhe politikan i CDU-së, do të bëjë ndërmjetësimin midis palëve. Ai është shumë i aftë për këtë. Besnik kundrejt kancelares, ai është një konservator i bindur që shpesh ka theksuar se e sheh për të rrezikshme politikën e Merkelit për refugjatët. Deri në vjeshtë të 2017-ës, ai ka qenë ministër i respektuar Finance në Gjermani. Por edhe ai nuk mund ta zgjidhë i vetëm konfliktin.
