“Nëse nuk duam vendlindjen, nuk duam të parët tanë, nëqoftëse nuk ruajmë traditat tona, në këtë botë kaq të madhe, e nganjëherë kaq kaotike, ne mund të jemi asgjë”.
Ndryshe nga pjesa tjetër e politikës dhe institucioneve të mbërthyera nga akuzat, kreu i shtetit, Ilir Meta ka zgjedhur të jap mesazhe larg debateve dhe konflikteve. Në aktivitetin e kreut të shtetit, ka një përkujdesje maksimale për t’u shmangur nga retorika e ashpër politike dhe për t’u fokusuar në çështje që kanë të bëjnë me interesat e qytetarëve të vendit. Aktivitetet protokollare, takimet zyrtare apo dhe qëndrimet në rrjetet sociale të kreut të shtetit, priren të vënë në dukje dhe të promovojnë zhvillimet pozitive në vend dhe kauzat për shtresat në nevojë.
I tillë ishte dhe takimi i zhvilluar dje në një zonë të thellë të Dibrës. Kreu i shtetit ishte dje pjesë e inaugurimit të shkollës “Ajet Ndreu” në Sllovë. E veçanta e këtij rikonstruksioni ishte se shkolla publike nuk ishte financuar nga paratë e shtetit, por nga një biznesmen i suksesshëm jashtë vendit, Shpend Ndreu, që me paratë e tij u siguroi kushte bashkëkohore fëmijëve të vendlindjes së tij. Një gjest i tillë nuk ndodh shpesh në Shqipërinë ku biznesmenët dalin në media vetëm kur flitet për koncesione dhe fonde që merren nga buxheti i shtetit. Ndaj në një ceremoni të tillë, Presidenti Ilir Meta dha mesazhin jo vetëm të promovimit të vlerave të Shqipërisë, por edhe si një model të ruajtjes së vlerave të vendlindjes për gjithë shqiptarët. “Mesazhi im është të forcojmë rrënjët tona. Të forcojmë ndjenjat e atdhedashurisë! Nëse nuk duam vendlindjen, nuk duam të parët tanë, nëqoftëse nuk ruajmë traditat tona, në këtë botë kaq të madhe, e nganjëherë kaq kaotike, ne mund të jemi asgjë. Prandaj që të vazhdojmë të jemi shqiptarë dhe të jemi krenarë për atë që kanë bërë të parët tanë, të bëjmë më shumë për vendin tonë, në mënyrë që edhe këta fëmijë të jenë akoma edhe më krenarë në të ardhmen për përkatësinë e tyre, edhe si dibranë, edhe si shqiptarë”,- tha Presidenti Meta.
Duke vlerësuar gjestin e biznesmenit, Presidenti tha se kjo vepër është një model për gjithë shqiptarët dhe një mesazh për të mos harruar rrënjët e dhe identiteti. “Të gjithë sot duhet të përulemi me shumë nderim para Shpendit për këtë punë e vepër që ka bërë, sepse Nënë Tereza me shumë të drejtë ka thënë që ndoshta ndonjë gjë të madhe mund të mos bëjmë në këtë botë, por secili prej nesh një gjë të vogël, me dashuri të madhe, mund ta bëjë. Unë besoj se ky është një mesazh shumë i fuqishëm që shkon përtej Dibrës e kudo tjetër ku ka shqiptarë, të cilët e duan vendin e tyre, traditat e tyre e të cilët janë krenarë për paraardhësit e tyre”,- tha ndër të tjera Presidenti Ilir Meta.
Në Dibër kreu i shtetit zhvilloi takime dhe me banorë të zonës ku u njoh nga afër me problematikat e tyre. Duke theksuar rëndësinë që kanë kushtet e shkollave, Presidenti u shpreh se arsimimi i të rinjve është prioritet për zhvillimin e qëndrueshëm të vendit në të ardhmen.
Teksa opozita ka zgjedhur që të vazhdojë rrëmujshëm serialet e akuzave me trafiqe e mazhoranca të flasë për armiq opozitarë dhe skenarë kundër integrimit, kreu i shtetit me gjeste të thjeshta po tregon se ka dhe një Shqipëri tjetër nga ajo e partive. Është Shqipëria që nuk jeton në ato pak kilometra nga kryeministria te selitë e partive. Është Shqipëria që nuk ka hallet e kryetarëve të partive, apo të kryeministrit që mendon si të qëndrojë me çdo kusht në pushtet, por përballet me probleme që duan zgjidhe dhe vëmendje. Ndaj dhe Presidenti me aktivitetin e tij nëpër Shqipëri po tregon se më shumë se hallet e politikanëve, rëndësi ka se çfarë po bëhet për të përmirësuar jetën e shqiptarëve./Kohajone/
