Nga Boldnews.al
Kreu i qeverisë Edi Rama, në turin e tij të zakonshëm, të idesë brilante të “bashkëqeverisjes me qytetarët”, ka mbledhur drejtues të administratës shtetërore dhe administratorë të “portalit” qeveritar shqipëriaqeduam.al. “Mund të shkojmë në zero vonesa dhe zero ryshfete, duke bërë të qartë që cdo punonjës në detyrë është i vëzhguar nga çdo qytetar që ka lidhje me detyrën në funksion të zgjidhjes së problemit”-deklaroi Rama. Kreu i qeverisë është optimist se në një kohë të shkurtër jo vetëm do të zhdukë përgjithnjë vonesat ndaj qytetarëve që përballen me zyrat e shtetit, por t’i japë fund edhe korrupsionit në administratën e lartë shtetërore.
“10.000 adresime të qytetarëve në Platformën e Bashkëqeverisjes shqiperiaqeduam.al, një mekanizëm bashkëveprimi mes qeverisë dhe njerëzve të zakonshëm për të kapërcyer pengesat administrative në zgjidhjen e halleve individuale e të problemeve të komunitetit, luftuar së bashku vonesat e pajustifikuara dhe kulturën e vjetër të rryshfetit në zyrat e shërbimeve për qytetarët, sa më shume t’a përdorim Platformen e Bashkëqeverisjes aq më shpejt do të kemi shërbimet që njerëzit meritojnë në zyrat e shtetit”- theksoi Rama, duke shtuar se qytetarëve i nevojiten vetëm tre minuta kohë për tu adresuar tek ky portal dhe do marrin zgjidhje në kohë.
Tre minuta, e ndoshta më pak mund të zgjasë ankesa e qytetarëve në portalin qeveritar, dhe është po aq e vërtetë që në një kohë të shkurtër këtyre qytetarëve u kthehet përgjigje, por përgjigjet janë në pjesën më të madhe të rasteve negative dhe punë nuk u kryhet. Ndryshon vetëm fjalori i përgjedhur, i ndryshëm nga atë që kanë dërgjuar drejtëpërdrejtë nga drejtuesit e institucioneve ku kanë shkuar. Por përfundimi mbetet se punë nuk u kryhet dhe sërish detyrohen të gjejnë “alternativa” të tjera të njohura, që për të zgjidhur një problem, ryshfeti është “ilaçi” më i mirë. Për një çështje në Hipotekë, në zyrat e ALUIZNI-it apo drejtoritë e tjera të shërbimit, qytetarëve u vjen gjithnjë një kthim përgjigje nga portal shqiperiaqeduam.al. Në shumë raste u thuhet: duhet të dërgoni X dokument, që prona juaj ka mbivendosje, që po kryhet dixhitalizimi, apo do e verifikojmë në terren… fakte që qytetarët i dinë, por çështja e tyre pavarësisht “kulturës” në përgjigje, mbetet sërish pa zgjidhje.
Vetë kryeministri e di fare mirë që në institucionet e larta të shtetit fenomeni korrupsion është i pranishëm. Ky fakt është përmenduar në raportin e fundit të Departamentit Amerikan të Shtetit (DASH), ku thuhej konkretisht: “Korrupsioni i përhapur në të gjitha degët e qeverisë”, gjithashtu nënvizohej se ndjekja penale dhe veçanërisht gjetja fajtorë e zyrtarëve që kanë kryer shkelje ishte sporadike. Zyrtarët, politikanët, gjykatësit dhe persona me interesa të fuqishme biznesi ishin shpesh në gjendje të shmangnin ndjekjen penale. Kryeministri, i ndodhur pa një bilanc mbi ekonominë në vend, punësimin apo investimet madhore, ka nisur turin në takime të shumta që i ngjan një fushate të përhershme elektorale dhe më shumë se të japë zgjidhje të drejtëpërdrejta me akte qeverisje, synon të pastrojë imazhin e administratës, edhe këtë jo me vepra, por propagandë, që është “karburanti” i makinës qeveritare…
