Parlamenti grek ka miratuar ditën e sotme një amendament që parashikon përgjysmim të tarifës së lejes së qëndrimit për emigrantët shqiptarë.
Kjo lëvizje erdhi pas paralajmërimeve të shpeshta të Komisionit Europian për aplikimin e tarifave shumë të larta në krahasim me vendet e tjera anëtare të BE-së, dhe lejet e qëndrimit bazuar ne legjislaturën e përbashkët europiane, nën udhëzimet e BE-së do të kenë kosto reciproke e të unifikuar.
Amendamenti i kaluar me urgjencë, ka të bëjë me lejet e qëndrimit 5-vjeçare të rezidentit afatgjatë, leje qëndrimi për bashkim familjar, leje për studime, leje personale “aftotelis”, karta blu.
Ndërkohë, nuk do të ketë ndryshim të tarifës për lejet e qëndrimit 10-vjeçare, për arsye të jashtëzakonshme dhe e brezit të dytë, vendime bazuar në legjislaturën greke për emigracionin.
Sipas amendamentit, kostoja e lejeve nën udhëzimin e BE-së do të jetë 150 euro, rreth 50% më pak se sa paguajnë emigrantët shqiptarë, disponues të tyre në Greqi.
Në të njëjtin amendament theksohet se emigrantët e papunë nga kriza ekonomike përfitojnë siguracion shëndetësor falas, si dhe shtetasit grekë, ndërsa për fëmijët mbi 18 vjeç do të kenë mundësinë të sigurohen nga prindërit, si për lejen e qëndrimit ashtu dhe për siguracionin shëndetësor.
