Athina zyrtare ka deklaruar se pret nga Shkupi që të bëjë hapin vendimtar për finalizimin e marrëveshjes për çështjen e emrit. “Topi gjendet në fushën e tyre”, nënvizoi zëdhënësi i qeverisë greke, Dimitris Tzanakopulos gjatë një interviste televizive.
Tzanakopulos tha se të dielën e kaluar, dy ministrat e jashtëm, Kotzias dhe Dimitrov patën një takim të suksesshëm dhe konkluduan kuadrin e përgjithshëm të marrëveshjes. Në këto momente, çështja ndodhet në duart e dy kryeministrave, ndërkaq, ajo që presim nga ana e udhëheqjes politike të FYROM, është që të bëjë hapin vendimtar, me qëllim që të avancojmë përfundimisht në një zgjidhje reciprokisht të pranueshme, të cilën duket se që të dy vendet e synojnë”.
“Zoti Zaev duhet të finalizojë veprimet e nevojshme politike edhe brenda vendit – dhe kjo është ajo që ne presim”, shtoi zëdhënësi i qeverisë greke.
Sipas tij, marrëveshja “do të garantojë me mënyrën më të mirë të mundshme interesat e vendit, si dhe kalimin në një emër të ri të vendit fqinj dhe kjo do të bëhet me kushte teknike dhe detyruese shumë specifike”.
