Pamjet që shihni i përkasin një kamere sigurie të farmacisë në Tiranë që u grabit këtë pasdite nga një 17-vjeçar. Në pamje shihet i riu, i cili hyn në biznes i pamaskuar, merr një qese të vogël me para e më pas largohet. Dallohet thika që ai mban në duar, që më pas u sekuestrua nga policia. Burime policore thanë se shuma e grabitur nga i riu është 90 mijë lekë të vjetra.
VIDEO e publikuar nga “News 24”
Pak pas grabitjes, R.N. 17 vjeç, u arrestua.
“Brenda një qendre tregtare, R.N., 17 vjeç, i ka vjedhur nën kërcënimin e një thike xhiron ditore të farmacisë, shtetases A.R., rreth 27 vjeçe (me detyrë punonjëse farmacie). Menjëherë pasi ky shtetas është larguar nga vendi i ngjarjes me sasinë e vjedhur të lekëve është njoftuar policia dhe bërë kapja e këtij shtetasi rreth 50 metra larg vendit të ngjarjes”, njoftoi zyrtarisht Policia.
Materialet në ngarkim të adoleshentit do t’i referohen Prokurorisë të Rrethit Gjyqësor Tiranë për veprën penale “Vjedhje me dhunë”, parashikuar nga neni 139 i Kodit Penal, shtuan të njëjtat burime.
