Këshilli i Ministrave ka miratuar tarifat vjetore të shkollimit për programet e ciklit të parë të studimeve në universitetet publike në vend. “Gazeta Shqiptare” publikon sot tarifat që do të duhet të paguajnë studentët që do të ndjekin një prej 293 programeve të studimit në 14 institucione të arsimit të lartë në Shqipëri. “Kufiri maksimal i tarifës vjetore të shkollimit për studentët që ndjekin studimet në institucionet publike të arsimit të lartë në një program të ciklit të parë të studimeve, në një program të integruar të studimeve ose në një program të studimeve profesionale me kohë të plotë, pasqyrohet në tabelën nr. 1, që i bashkëlidhet këtij vendimi dhe është pjesë përbërëse e tij”,-theksohet në vendimin e publikuar ditën e djeshme në Fletoren Zyrtare.
Sipas këtij të fundit institucionet publike të arsimit të lartë, brenda muajit prill, por, në çdo rast, jo më vonë se 90 ditë para fillimit të vitit akademik, me vendim të organeve kolegjiale, duhet të miratojnë tarifën vjetore të shkollimit për çdo program studimi brenda kufirit maksimal të përcaktuar. Pas miratimit, tarifat vjetore të shkollimit, të miratuara me vendim të bordit të administrimit, do të bëhen publike në faqen zyrtare të institucioneve publike të arsimit të lartë. Sipas vendimit të Këshillit të Ministrave studenti i nënshtrohet vetëm një tarife vjetore shkollimi, ndërsa ata të cilësuar si përsëritës, do t’i nënshtrohen tarifës vjetore të shkollimit të vitit akademik në të cilin vazhdojnë studimet.
“Studenti, i cilësuar në bazë të rregullores së institucionit të arsimit të lartë publik si përsëritës në një lëndë apo në shumë lëndë dhe vijon studimet në vitin pasardhës, i nënshtrohet tarifës së shkollimit për kredit për detyrimet apo lëndët përsëritëse, si dhe tarifës vjetore të shkollimit të vitit akademik në të cilin vazhdon studimet. Studentët, që transferojnë studimet nga një program studimi të ciklit të parë në një program tjetër studimi të ciklit të parë në institucionet publike të arsimit të lartë, i nënshtrohen tarifës vjetore të shkollimit të programit të studimit përkatës, në të cilin transferohen dhe ndjekin studimet”,-thuhet më tej në Fletoren Zyrtare.
Ndërkohë të gjithë kandidatët që kanë përfunduar me sukses një program studimi, kanë të drejtë të ndjekin një program të dytë studimi, e në këtë rast, aplikantët fitues do të përballojnë koston e plotë të studimeve, me përjashtim të studentëve të shkëlqyer. Edhe shtetasit e huaj, që vazhdojnë studimet në një program të parë apo në një program të dytë studimi të ciklit të parë në institucionet publike të arsimit të lartë, i nënshtrohen së njëjtës tarifë vjetore të shkollimit, si shtetasit shqiptarë, me përjashtim të rasteve kur janë vendosur mënyra të tjera të përcaktimit të tarifave vjetore të shkollimit.
