Panuçi: Kombëtarja nuk është vend pune

Kristian Panuçi kërkon një sukses të dyfishtë në miqësoret ndaj Kosovës dhe Ukrainës. Trajneri italian i kuqezinjve shpreson që në këtë mënyrë të përgatisë ashtu siç duhet grupin e lojtarëve me të cilët do të përballojë Ligën e Kombeve dhe Kampionatin Europian. Panuçi shpreson të marrë përgjigjet e duhura nga lojtarët e grumbulluar, ndërsa deklaron se në Kombëtare asnjë nuk e ka derën e mbyllur, duke përfshirë këtu edhe lojtarët që nuk i ka thirrur për këto dy sfida miqësore. Një nga emrat e rinj të Kombëtares kuqezi është Sindrit Guri. Shkodrani grumbullohet për herë të parë me Shqipërinë, ndërsa Panuçi shpreson që 24-vjeçari të rritet shumë në Belgjikë.
Ka një strategji për të thirrur lojtarë nga Superiorja?
Superioren e ndjek thuajse çdo jave dhe kam nën vëzhgim të gjithë elementet që mund t’i shërbejnë Kombëtares. Këtë herë ishte radha e Gurit, që ka bërë një sezon shumë të mirë, por lojtarë si ai dhe të tjerë janë gjithmonë të mirëpritur, nëse paraqiten mirë.
Si ju është dukur gjendja e të grumbulluarve?
Do të jenë shumë të rëndësishme këto dy ndeshjet e fundit. Janë teste për të formuar grupin, për skuadrën që do luajë në Ligën e Kombeve. Po provojmë edhe për ndonjë lojtar që nuk i ka minutat në këmbë.
Nuk ka shumë mundësi këto ndeshje…
Kemi mundësi, kemi një grup shumë të mirë. Edhe ata lojtarë që nuk janë tani, nuk do të thotë që nuk do jenë në shtator. Dua të jemi fitues në grupin tonë në Ligën e Kombeve. Do shoh edhe çfarë do ndodhë në ndeshjet e tjera.
Një mesazh për lojtarët që nuk janë grumbulluar?
Mesazhin duhet të ma japin ata mua dhe jo unë atyre. Sinjalet duhet t’i japin ata. Unë i ndjek çdo të shtunë e të diel. Jo të gjithë mund të vijnë këtu, sepse nuk është një vend pune. Do vijnë ata që e meritojnë. Që nga dita e parë që kam ardhur, mesazhi kryesor ka qenë se kam grumbulluar lojtarët më të mirë dhe më në formë.
Lojtarë të rinj?
Ne kemi skautët tonë në të gjithë Europën dhe kur ata më japin indiciet e para, unë shkoj. Në çdo moment mund të lindë një talent i ri.
Guri ka shënuar më shumë nga të grumbulluarit. Impakti i parë, dhe sa shanse ka të jetë titullar?
Është një lojtar shumë serioz dhe ka punuar shumë. Ka bërë një sezon të madh. Mendoj se ka inteligjencën e duhur që të kuptojë se në Europë është diçka tjetër, po ashtu edhe Kombëtarja, pa fyer nivelin e Superiores.
A është sfida me Kosovën, edhe një betejë në kuadrin e përthithjes së talenteve?
Nesër është një ndeshje miqësore, ku si unë, ashtu edhe trajneri i Kosovës kemi synim për të eksperimentuar dhe për të marrë sinjale sa më të mira, në kuadër të ndeshjeve të Nations League. Sa u përket talenteve, shqiptarët janë të ndarë në 3 shtete dhe unë kam emisarët e mi, me të cilët përpiqem t’i ndjek që të gjithë. Më pas, nëse shoh elementë të mirë, ju prezantoj thirrjen për t’iu bashkuar Shqipërisë, por zgjedhja u takon atyre.
Pas humbjes me Norvegjinë, e shikoni si detyrim fitoren ndaj Kosovës?
Duhet të jemi seriozë në atë që bëjmë dhe të japim maksimumin në çdo ndeshje. Verdiktin e jep fusha, por ne futemi gjithmonë në lojë për të fituar, ndonëse janë 3 rezultate. Për mua rëndësi ka të vlerësojmë maksimalisht çdo kundërshtar dhe të japim më të mirën, pastaj rezultati del disi në plan të dytë.
A janë zgjedhur kundërshtarët e miqësoreve, që të jenë të përafërt me ato të Ligës së Kombeve?
Kemi zgjedhur dy kundërshtarë, një të fortë dhe një më pak të fortë, për të parë se si do të mund të komportohemi në fushë. Norvegjia ka qenë një kundërshtar që luan përafërsisht si Skocia dhe në atë ndeshje kemi qenë në lojë deri në fund. Pavarësisht se kishim shumë lojtarë që nuk luanin në skuadrat e tyre, ishim në lojë dhe mund të shmangnim humbjen.