Ndërsa Federata Argjentinase e Futbollit kishte përpiluar një manual të vërtetë për të ndihmuar tifozët për të “shënuar” me femrat ruse, trajneri i Nigerisë, Gernot Rorh, ia ka ndaluar kategorikisht këtë gjë lojtarëve të skuadrës së tij.
Sipas medieve në shtetin afrikan, trajneri i ka paralajmëruar lojtarët që nuk duhet të “ngatërrohen” me vendaset, ndërsa i ka lejuar që gratë dhe familjarët e tjerë t’I vizitojnë vetëm pas ndeshjeve ose kur kanë ditët e pushimit dhe nuk po përgatiten për ndeshje.
“Sigurisht që lojtarët mund të takohen me gratë dhe pjesëtarë të tjerë të familjeve gjatë Kupës së Botës. Por nuk do t’i lejojë të fusin vajza ruse, jo jo dhe jo. Vetëm kapiteni Mikelo, partnerja e të cilit është ruse, mund të vijë me të”, tha Rorh. Sipas tij, kjo masë merret për të shmangur shpërqendrime dhe për të ruajtur disiplinën në grumbullimin e kombëtares gjatë turneut. “Masat disiplinore duhet të jenë të forta. Familjarët mund të qëndrojnë edhe të hanë me ne, nuk kam asnjë problem për këtë. Secili ka dhomën e tij dhe ata janë të lirë të vijnë”.
Duket se vendimi i trajnerit është mirëpritur nga lojtarët. Kapiteni John Obi Mikel siguroi tifozët se në këtë mënyrë skuadra mund edhe të kalojë përtej 1/16-ave. “Nëse luajmë si skuadër do të shkojmë larg përtej grupeve dhe 1/16-ave. Të rinjtë në skuadër do të na ndihmojnë shumë. Dua të mbahem mend si një lojtar që ka dhënë gjithçka për kombëtaren, por edhe si kapiten i skuadrës që fiton Botërorin për herë të parë”.
