Bomberi i Kombëtares, Sokol Cikalleshi, doli sot së bashku me Manajn në konferencën për shtyp para gazetarëve.
Sulmuesi kavajas foli për përgatitjet e ndeshjes ndaj Kosovës që do të luhet ditën e martë duke treguar se trajneri po punon mjaft mirë një stërvitje.
Cikalleshi ka folur edhe për të ardhmen, ku ka treguar që pas rënies së Osmanlisporti, me shumë gjasa ai do të luajë përsëri në Superligën turke.
Pjesë e Kombëtares: Të jesh pjesë e Kombëtares është gjithmonë kënaqësi dhe nder. Për mua është gjithmonë si hera e parë. Me trajnerin ndihemi mirë dhe po punojmë në stërvitje taktike, që do të na ndihmojë në ndeshjen me Kosovën. Ne bëjmë punën tonë, duke bërë më të mirën në stërvitje, pastaj është trajneri ai që vendos për formacionin. Gjithmonë ka pasur ndryshime. Për mua dhe sulmuesit e tjerë ne jemi të gatshëm për çdo situatë, pastaj varet nga zgjedhjet e trajnerit.
E ardhmja: “Duke qenë se Omsanlinspori ra në kategorinë e dytë, e ardhmja është disi mister dhe menaxheri po merret me ofertat. Kjo verë do të jetë disi e lodhshme për mua, mendoj se do të luaj përsëri në Superligë, por duhet të jetë interesi i përbashkët edhe me klubin. Kam edhe dy vjet të tjera kontratë dhe jam profesionist. Nuk jam lojtar që e braktis anijen. Por do të jetë interes i përbashkët, nëse largohem, do të largohem me marrëveshje, me dëshirën e klubit. Do të jem me shumë mundësi në elitën e futbollit turk.
Kosova dhe Ukraina: Ndeshja e parë me Kosovën është disi më interesante, konsiderohet vëllazërore, por do të jetë e luftuar në fushë. Edhe atmosfera në tribunë do të jetë shumë e bukur. Uroj të marrim rezultat pozitiv. Pastaj kemi Ukrainën, ekip disi më i fortë. Jemi ndeshur me këtë skuadër para Europianit dhe na mundi. Duhet t’i bëjmë gjërat më ndryshe këtë herë. Do të jetë test i mirë për trajnerin dhe lojtarët, për të parë se ku jemi.
