Gjithçka duket gati! Me mesazhin “Pasha po vijmë”, qytetarët nga rrethet janë nisur drejt kryeqytetit për të marrë pjesë në tubimin e organizuar të PD-së që kulmon sot në orën 11:00 në Tiranë.
Makinat të cilat po vijnë nga Shkodra mbajnë mesazhet: “Pasha po vijmë, na prit pasha”!
Mësohet se nga Gjirokastra janë nisur 5 autobusë, ndërsa deri më tani sipas informacioneve të marra nga rrethet e tjera rezulton se 12 makina janë nisur nga Përmeti, 12 gjithashtu nga Tepelena dhe një autobus, nga Memaliaj 6 makina të vogla.
Ndërkaq nga Korça pritet pjesëmarrje më e ulët pasi mungon organizimi nga opozita. Burime nga selia blu, bëjnë me dije se qytetarët nga të gjitha qytetet i janë drejtuar kryeqytetit me mjete të vogla.
Kjo protestë e thirrur nga kryetari i Partisë Demokratike Lulzim Basha, vjen pas publikimit të audio-përgjimit, ku vëllai i ministrit të Brendshëm Fatmir Xhafaj, Agron Xhafaj shfaqet në një bisedë për trafik droge.
Nëpërmjet protestës së sotme kërkohet dorëheqja e Kryeministrit, Edi Rama dhe ministrit të Brendshëm, Fatmir Xhafaj.