“Shtetet e Bashkuara po kërkojnë të rrisin partneritetin e tyre me vendet e Ballkanit në luftën kundër ekstremizmit dhe krimit të organizuar”. Kështu është shprehur prokurori përgjithshëm, Jeff Sessions.
Në një takim të zhvilluar në Zagreb, me zyrtarë të zbatimit të ligjit nga Shqipëria, Bosnja dhe Hercegovina, Kroacia, Kosova, Maqedonia, Mali i Zi dhe Serbia, Sessions u shpreh se bashkëpunimi ka prodhuar tashmë rezultate të mira, por nevojiten më shumë përpjekje.
“Ne vazhdojmë të përballemi me kërcënime serioze nga terrorizmi, trafikantët e drogës, trafikantët e qenieve njerëzore, kriminelët e organizuar dhe korrupsioni. Kriminelët përdorin kufij për t’u fshehur pas tyre. Nuk mund ta lejojmë që të ndodhë”, u shpreh prokurori i përgjithshëm, raporton The Associated Press.
