U komentua shumë jo vetëm nga mediat shqiptare, por edhe nga ato greke për deklaratat e saj mbi Notis Sfakianakis, i cili mbajti një natë më parë koncert në Tiranë.
Është fjala për gazetaren Fatma Haxhialiu, e cila foli në një lidhje telefonike në “Pop Culture” pasi përfundoi në mediat greke pas deklaratave kundër këngëtarit Notis Sfakianakis.
“Në Greqi më kanë vlerësuar me komentet e tyre. Më kanë quajtur si të zonjën dhe që di të mbroj me argumente mendimin tim. Kur e thonë ata, kjo pjesa tjetër le të ngelet spekulative”, tha Fatma.
Çfarë ndodhi kur e pe veten në mediat greke?
“Nuk e mendoja që do të merrte këto përmasa dhe të merrja këtë vëmendje nga shtypi grek. Më kanë shkruar njerëz pafund për ato që kishin nxjerrë mediat greke”, tha Fatma.
Më tej, Fatma thotë se ja ka arritur qëllimit. “Notis foli shqip, tha: Shqiptarë ju dua! Na u përul. Lëpiu aty ku kishte pështyrë”, tha gazetarja.
Që Notis Sfakianakis ka pasur shumë adhurues në Shqipëri, kjo u pa edhe nga radhët e gjata për të hyrë brenda ambienteve të Pallatit të Kongresit, por jo të gjithë mbetën të kënaqur nga koncerti i zhvilluar të enjten mbrëma në Tiranë.
Një ndër to është është edhe gazetarja Dasara Karaiskaj, e cila në një lidhje telefonike për “Pop Culture” e vlerësoi si jo serioze paraqitjen e këngëtarit grek në koncertin e organizuar në Tiranë.
“Po t’i pyesje të njëjtit njerëz pasi dolën nga Pallati i Kongreseve, a ia vlejti të prisnin Notis Sfakianakis për dy orë dhe ai të dilte në skenë kur të donte. Duke lënë teknikën super të lodhur, e të tjerë… Të fillosh një koncert nga ora 8 në orën 10, sepse në këtë orar dua unë… Këtë ma konfirmoi edhe një prej miqve të tij më të ngushtë, i cili më tha se: ‘E ka pak këtë pjesën, këtë natyrën ‘psikopate’ në thonjëza’. Por mua, kjo nuk mu duk aspak serioze…”, deklaroi Dasara për “Pop Culture” në Top Channel.