Gjykata e Fierit ka bërë publik arsyetimin e vendimit për lirimin e ish-deputetit Mark Frroku. Në vendimin e gjykatës thuhet se kërkesa e Frrokut ka qenë e mbështetur në prova dhe në ligj. “Gjykata pasi analizoi provat e paraqitura nga palët arrin në përfundimin se kërkesa e kërkuesit M.F me objekt “Lirim para kohe me kusht” është e mbështetur në prova dhe në ligj dhe për pasojë duhet pranuar”, thuhet në vendim.
Po ashtu në këtë vendim thuhet se për lirimin para kohe më kusht janë marrë disa faktorë, ku shkruhet se: Me sjelljen dhe punën e tij tregon se me dënimin e vuajtur është arritur qëllimi për edukimin e tij.
4 ARSYET QË ÇUAN NË LIRIMIN E FRROKUT
1- Të ketë vuajtur jo më pak se 3/4 e dënimit për krime me masa dënimi mbi 5 vjet deri në maksimumin e parashikuar nga ligji,. Sipas dinamikës së vuajtjes së dënimit të datës 25.04.2018 kërkuesi M.F nga dënimi i kanë mbetur për të vuajtur dhe 1 vit 5 muaj 18 ditë burgim. Ndërsa nga dita e shpalljes së vendimit datë 09.05.2018 i mbeten për të vuajtur edhe 1(një) vit 5(pesë) muaj e 5 (pesë) ditë burgim. Nga dinamika e vuajtjes së dënimit rezulton se kërkuesi M.F nuk ka përfituar ulje dënimi për shkak të amnistisë .Përsa më sipër, rezulton se kërkuesi M.F deri ditën e gjykimit ka vuajtur më shumë se 3/4 e dënimit të dhënë, duke plotësuar kështu një nga kërkesat e parashikuara në nenin 64 të Kodit Penal.
2- Me sjelljen dhe punën e tij tregon se me dënimin e vuajtur është arritur qëllimi për edukimin e tij. Sipas vlerësimit të sjelljes nr.923 Prot. datë 26.04.2018 paraqitur nga përfaqësuesi i I.E.V.P.Fier me objekt “Lirim me kusht” rezulton se: “… gjatë bisedave të zhvilluara shprehet i penduar mbi veprën penale … marrëdhëniet me personelin, bashkëvuajtësit dhe familjarët e tij janë korrekte dhe shumë të mira.…nuk është i motivuar të marrë pjesë në kurset e formimit profesional…frenkuenon ambientet sportive si dhe veprimtaritë edukative-kulturore..dhe nuk ka marrë masa disiplinore. ”. Të dhënat e mësipërme konfirmohen dhe nga vlerësimet e sjelljeve që ndodhen në dosje. Në këto kushte, sjellja dhe puna e të dënuarit M.F ja ka arritur qëllimit për edukimin e tij.
3- I dënuari të mos jetë përsëritës për krime të kryera me dashje. Sipas vërtetimit të gjëndjes gjyqësore nr.16 Prot. datë 12.04.2018 lëshuar nga Drejtoria e Përgjithshme e Burgjeve rezulton se rezulton se kërkuesi (i dënuari) M.F nuk është dënuar më parë .Në këtë vërtetim pasqyrohet vendimi i dënimit të cilin kërkuesi M.F është duke vuajtur dhe për të cilin kërkon lirimin me kusht. Përsa më sipër edhe ky kusht i kërkuar shprehimisht nga neni 64 i Kodit Penal përmbushet.
4- I dënuari të ketë arsye të veçanta për të përligjur lirimin e tij me kusht. Për të vërtetuar këto arsye, kërkuesi M.F paraqiti këto prova:
a- Kërkuesi M.F ka një familje e cila përbëhet nga ai vetë bashkëshortja, nëna, babai, fëmijët e tij dhe të vëllatit të tij, sipas çertifikatës familjare datë 10.04.2018.
b- Bashkjëshortja e tij vuan nga një sëmundje e rëndë.
c- Prindërit e tij janë të moshuar dhe në gjendje jo të mirë shëndetësore..
d- Ai është ortak i shoqërisë A.M – L Group.
