Cilin shtet do të përfaqësojë Shkëndija e Tetovës? Shqipërinë apo ish-Republikën Jugosllave të Maqedonisë? Kjo është pyetja ironike që ngrenë mediat në vendin fqinj, dukshëm të bezdisura nga festa kuqezi e Tetovës. Përballja ndaj Pelisterit legjitimoi një titull të fituar javë më parë dhe që i dha jetë festës së një etnie të tërë. Shqiptarët në Maqedoni janë praktikisht gjysma e popullatës, etni shtetformuese, por që në 27 vitet e ekzistencës së FYROM-it, ka vuajtur trajtimin e pabarabartë nga pjesa sllave, ndaj dhe kurrë nuk ka harruar të evokojë origjinën e saj.
Prandaj dhe stadiumi i Tetovës ishte i gjithi kuqezi. Kuqezi si fanella e Shkëndijës, kuqezi si uniforma e Ballistëve, kuqezi si flamujt kombëtarë të shpërndara në tribunat e impiantit. Portali “Sport” shkruan: “Pas dy muajsh, kur të nisë Champions League, cilin vend do të përfaqësojë Shkëndija? Festa në Tetovë ishte kuqezi me shqiponjën që fluturoi në stadium si pjesë e koreografisë së tifozëve”. Sezonin e shkuar Shkëndija u aktivizua në Europa League. Në të gjitha transfertat që mori pjesë, skuadra e Tetovës u mirëprit në gjuhën shqipe “Mirë se vini”, por edhe atëherë mediat sllave u bezdisën.
