Batuta, lavdërime për gratë, nervozizëm me ata që nuk respektonin radhën e fjalës, por jo vetëm.
“Çajupi që ju ka njohur mirë e ka thënë që pika që nuk iu bie se nga gratë rroni. Tani ta fillojmë nga ato që ju mbajnë juve”,- e nisi kryeministri.
Në këmbë ngrihet një burrë, do të marrë fjalën
Rama: Ti nuk je grua me sa shoh…jo, jo je burrë ti, nuk ta jap fjalën. Ulu, po nuk mbaruan gratë juve nuk iu vjen radha. Unë kështu e kam, imagjinoje njëherë të mos kesh gruan me vete.
Tenton të marrë fjalën një burrë, por mikrofonin e ka një grua
Rama: Po ulu more! Nuk je grua. Si të duket vetja ty të duket më i mirë se kjo. Ulu, ulu se e ka radhën ajo zonja me gjyslyke
Ndërsa një i moshuar merr fjalën Rama vijon sërish i nervozuar me një burrë tjetër: Ulu more ulu ti aty. Ore je në vete apo jo. Ulu more vëlla se më shkatërrove. Ore nga je ti nga Tepelena je? Ose nga Tepelena ose nga Golëmi je ti, tjetër mundësi nuk ka. Po rri more rri, prit tani se do flasin edhe të tjerët.
E ndërsa mikrofoni kalon nga dora në dorë, kryeministri vazhdon: Jepja këtij të Golëmit të shpëtojë, çfarë do thuash ti? Ngrihu
Qytetari ngrihet: Ke 5 vjet qeverisje për pensionet e fshatit çfarë ke menduar…
E ndërsa qytetarët shprehin ankesat, edhe kryeministri shton dozën e batutave: Jepja pak këtij zotërisë këtu se po qan
Qytetari: Po nuk qave mbaron
Merr fjalën një tjetër qytetar: Para 18 muajsh të ngritura problemin e rrugës, me the miku im sot për sot nuk ta jap fjalën. Posedoj 12 mijë krerë bagëti…
Rama: E di e di
Qytetari: Më fal për shprehjen nga 7 neve nga mungojnë 8. Nuk kemi sinjal telefonik…
Rama: E di mo e di rastin, se kemi folur
Qytetari: Nuk kemi ujësjellës, nuk ka qendër shëndetësore
Rama: Po e di mo…
Qytetari: Pra s’kemi asnjë lloj shërbimi. Nuk kërkojmë as punë as bukë, vetëm këto gjëra
Rama: Tani po më bind për një gjë që e di?!
Qytetari: Jo, më fal ta shpjegoj…
Rama: Por çfarë do më shpjegosh, e di. Me Dhimon dil e fol në kafe, ja ku e ke. Shko. Jepja pak zotërisë
Qytetari tjetër: Jam paraqitur tek ALUIZNI s’po shoh dritë jeshile
Rama: Shkruaj tek Shqipëria që duam.al. Po nuk dite internet merr nipin e mbesën./News24
