Peter Pakult ka qenë një futbollist i njohur i kombëtares së Austrisë, me të cilën ka zhvilluar 24 takime, gjithashtu në klubet ku ka luajtur ka shkëlqyer sidomos me Rapidin e Vjenës, Innsbruck, Austrinë e Vjenës, ku ka shënuar plot 206 gola në karrierën e tij në 448 takime. Pakult e nisi shumë mirë karrierën si trajner, ku fitoi titullin me Rapidin e Vjenës, e mbas saj trajnoi Leipzig e Dinamo Dresden, por mbas tyre karriera i erdhi në ulje, ku pati dështime mbas sezonit 2012-2013, me Zavrc, Cibalia, Radnicki, apo më parë me Floridsdorfer në Vjenë.
Në vendin e tij e cilësuan si të dështuar trajnerin e fundit që nxori Rapidin kampion, ndërsa është me Kukësin sezoni që ai rikthehet në Kupat e Europës. Është një nga mediat më të mëdha austriake “krone.at”, e cila i bën jehonë gjysmësezonit të shkëlqyer të Pakultit me Kukësin, i cili në 18 takime ka fituar 11 ka barazuar 3 e ka humbur 4. Vendi i dytë mund të jetë i artë për Kukësin, pasi për shkak të një dënimi të mundshëm të Skënderbeut, Kukësi mund të luajë në Champions Ligë.
Trajneri i Kukësit ka folur për këtë media duke theksuar se është duke punuar i qetë te Kukësi dhe se do shohë se si do shkojnë gjërat për në Kupat e Europës dhe për sezonin tjetër, pasi kontrata për shkak të rezultateve është rinovuar automatikisht, ndërsa natyrisht e cilëson si tërheqëse dhe është i kënaqur me atë çka ka arritur.
“Është tërheqëse kjo që po bëjmë, por shikoni çfarë ndodh kur të lënë të punosh i qetë. Është kënaqësi për mua të vijoj kështu, pasi po tregoj që shumëkush ka gabuar me ato që thoshin”, ka thënë trajneri Pakult.
Burimi: http://www.panorama.com.al/sport/trajneri-pakult-krenohet-ne-austri-nese-me-lene-kohe-bej-cudira/
