Nga Boldnews.al
Ambasadori amerikan, Donald Lu, më në fund ka vendosur që të mos lejojë Edi Ramën të fshihet pas heshtjes së tij. Diplomati ka reaguar mesditën e së premtes, duke i kërkuar kryeministrit shqiptar që, për çështjen e vëllait të dënuar të Fatmir Xhafës, “ai (Rama) të flasë në emrin e tij. SHBA do të flasë në emrin e saj”.
Kryeministri Edi Rama, duke iu përgjigjur akuzave të Partisë Demokratike për fshehje të vendimit të dënimit të vëllait të Ministrit të Brendshëm, deklaroi në Kuvend se “nëse do të qëndronin akuzat, do të fliste SHBA”.
Madje, në gjuhën e tij plot stilistikë, kryeministri lëshoi edhe një seri batutash ironike për ambasadorin Lu. Një herë duke e quajtur “protagonisti i jetës tonë publike”, pastaj ” miku ynë i shtrenjtë” dhe “njohësi i kudondodhur i të gjithë proceseve tona për të vënë drejtësi në këtë vend”, Rama ironizoi ambasadorin e heshtur, i sigurtë që ai nuk do të thotë asgjë.
Por, “nuhatja” e Edi Ramës duket se kësaj radhe nuk funksionoi siç duhet. Ambasadori Lu duket që paska qenë i detyruar, më në fund, të thyejë heshtjen dhe të japë një lloj komenti për rastin më të diskutuar të javës së fundit në politikën dhe opinionin publik shqiptar. Ambasadori amerikan, i cituar nga mediat, ka thënë gjithashtu se ‘SHBA po shqyrton akuzat ndaj vëllait të Fatmir Xhafaj”.
Partia Demokratike publikoi të mërkurën vendimin e dënimit për Agron Xhafaj. Ai është dënuar me 7 vjet e dy muaj burgim nga Gjykata e Kasacionit në Itali. Por, deri më tani, publiku shqiptar nuk ishte njohur me këtë vendim.
Madje, sa herë është përmendur publikisht hetimi për vëllain e Fatmir Xhafës, kryeministri Edi Rama ka ironizuar opozitën, duke mos i vlerësuar asnjëherë seriozisht denoncimet e saj. Nga ana tjetër, as ambasadori amerikan në Tiranë, Donald Lu, i cili po kërkon me ngulm “peshq të mëdhenj” në Shqipëri, nuk ka dhënë asnjë deklaratë për këtë rast, pavarësisht se në hetimin e grupit ku bënte pjesë edhe Agron Xhafaj, ishte përfshirë edhe DEA amerikane.
Me reagimin e sotëm, ambasadori Lu duket se po tenton të dalë sa më i larë me heshtjen e tij olimpike për kultivimin dhe trafikun e drogës në Shqipëri. Në fakt, nuk është detyrë e ambasadorit të flasë për hetime të brendshme. Por, rasti “Lu” është shumë specifik. Ai ka folur deri edhe për të mbathurat e Shukriut (Xhelilit), por për kanabizimin dhe trafikun e tonelatave drogë nga Shqipëria në drejtim të Europës, duket që nuk e ka parë të arsyeshme të flasë. Mesa duket, ironia e pavend e Edi Ramës e ka detyruar ambasadorin të thyejë heshtjen e tij. Po tani, kryeministër, a foli ambasadori Lu?
